Qytaıdyń «Tielin Logistics Invest» kompanııasy Qyzyljar óńirinde iri óndiris oryndaryn salý maqsatymen birneshe jobalardy júzege asyrýǵa kiristi.
Eki taraptyń ózara ýaǵdalastyǵy boıynsha ındýstrıaldy park qurylyp, segiz joba sheńberinde pestısıdter men tyńaıtqyshtar, mashına jasaý zaýyttary, logıstıkalyq ortalyq, taǵy basqa óndiristik oshaqtar salynatyn bolady. Ol úshin Qyzyljar aýdany aýmaǵynan 400 gektar jer telimi bólinip, qaǵaz-sellıýloza kombınaty men temirjoldyń eki jelisiniń qurylysy bıyl bastalady. Qarjylyq jaǵynan qamtamasyz etýdi aspanasty eliniń ınvestorlary óz mindetterine alǵan. 1,5 myń jumys oryndary qurylady dep jobalanýda.
Jýyrda kompanııanyń bas dırektory Jang Ksıýmıng bastaǵan delegasııa óńirge kelgen jumys saparynda M. Qozybaev atyndaǵy Soltústik Qazaqstan memlekettik ýnıversıtetiniń basshylyǵymen de kezdesip, bilikti kadrlar daıyndaý jaıy qyzý talqylandy. Keleshekte ınjener, agronom, mashınajasaýshylar, elektroenergetıkter,bıotehnologtar mamandyqtaryna suranystyń artatyny eskerilip, olardy tájirıbeden ótkizýdiń, básekelestikke qarymdylyǵyn arttyrýdyń, jumysqa ornalastyrýdyń naqty qadamdary atap kórsetildi. Ýnıversıtettiń rektory Serik О́mirbaev óz sózinde Qytaı kompanııasy salatyn óndiris oryndaryn jergilikti kadrlarmen tolyqtyrýǵa ázir ekendikterin, materıaldyq-tehnıkalyq bazany jańartý, professor-oqytýshylar quramyn irikteý jumystary jalǵasyp jatqanyn jetkizdi. Oqýlyqtar men oqý-ádistemelik jaǵynan kómek berilse, qytaı tilin oqytýdy qolǵa alar edik, dedi ol. Qarsy jaq ókilderi usynysty qabyl alyp, jumys kúshi zárýligi birigip sheshiletinine, barlyq qajetti jaǵdaılar jasalatynyna sendirdi. Olardy eńseli oqý ornynyń aýyl sharýashylyq jáne tehnıkalyq áleýeti de qyzyqtyrdy. Aýqymdy jobalar úsh kezeńnene turady. Alǵashqysy jyl aıaǵyna deıin paıdalanýǵa beriledi. Oylaısha ózara kelisimimen bekitilgen memorandým sheńberinde iri qara malǵa arnalǵan jemshóp óndirisi, agrohımııa jáne aýyr ónerkásip salasyndaǵy qoldanbaly ǵylymı-zertteýler keshendi túrde iske asyrylady. Buǵan qosa aldaǵy ýaqytta soltústikqazaqstandyq stýdentter qytaılyq ozyq kásiporyndarda tájirıbeden ótip, ınvestısııalyq baǵdarlamalar boıynsha salynatyn zaýyttarda eńbek ete alady.
«Prezıdenttiń bes bastamasy» Úndeýinde atap ótilgendeı ónerkásiptik revolıýsııa jaǵdaıyndaǵy jańa ekonomıkada zor suranysqa ıe jańa mamandar daıarlaý–basty talaptardyń biri. Memorandým negizinde «Jol kartasy» jasalyp, jylyna 10-15 stýdent Qytaıda til úırenýmen qatar biliktilikteri men sheberlikterin shyńdap qaıtady. О́zimizde qytaı tilin meńgerý úshin daıyndyq kýrstary júrgiziledi. Aspanasty elinde turyp jatqan etnıkalyq qazaqtardy qyzmetke shaqyrýdyń joldary oılastyrylǵan», deıdi halyqaralyq strategııa jáne yntymaqtastyq máseleleri jónindegi prorektor Aıdos Muqataev.
О́mir Esqalı,
«Egemen Qazaqstan».
Soltústik Qazaqstan oblysy.