«Bilim-ǵylym úırenbekke talap qylýshylarǵa áýeli bilmek kerek. Ekinshi – ǵylymdy úırengende, aqıqat maqsatpen bilmek úshin úırenbek kerek» degen Abaıdyń 32-qarasózimen tuńǵysh ret el pedıatrlarynyń ǵylymı májilisi ótti. «Pedıatrlar odaǵy» qoǵamdyq birlestigi men S.Asfendııarov atyndaǵy QazUMÝ-dyń balalar aýrýlary kafedrasy uıymdastyrǵan jıyn pedıatrııa jáne balalar hırýrgııasynyń búgingi ózekti máseleleri taqyrybyna arnaldy.
Almatydaǵy Pedıatrııa jáne balalar hırýrgııasy ǵylymı ortalyǵynda ótken shara elimizdiń barlyq medısınalyq JOO doktoranttary men magıstranttaryn jáne medısınalyq mekemelerde rezıdentýrada oqyp jatqan 100-den astam jas pedıatr dárigerleriniń basyn qosty.
– Bul sharany ótkizýdegi basty maqsat – jas ǵalymdardyń ǵylymdaǵy baǵyty men bilim berý salasynyń mańyzdy máselelerin taldaý, jas ǵalymdardyń ǵylymı áleýetin arttyrý, pedıatrııa jáne balalar hırýrgııasy salasyndaǵy ózekti máselelerdi kóterý arqyly jas mamandardy ǵylymmen aınalysýǵa shaqyrý. Konferensııaǵa úzdik dep tanylǵan, arnaıy komıssııa alqasynan irikteýden ótken ǵylymı jumystar usynyldy. Búgingi tańda jas pedıatrlardy daıyndaýda bilim, ǵylym men tájirıbeni ushtastyrý mańyzdy. Ǵylym men bilimniń ıntegrasııasy zamanaýı eksperımenti bazada naqty ǵylymı-zertteýler negizinde jas mamandardy daıyndaýǵa múmkindik beredi, – dedi Pedıatrııa ortalyǵynyń basshysy Rıza Boranbaeva.
Ǵylymı konferensııada balalardaǵy aýrýlardy emdeý men dıagnostıkalaýdyń zamanaýı ádisteri, balalarǵa medısınalyq kómek berýdi uıymdastyrýdyń aspektileri, sırek aýrýlardy emdeýdi jetildirý, túrli hırýrgııalyq jáne somatıkalyq patologııalary bar balalardy ońaltý, psıhologııalyq jáne medısınalyq-áleýmettik beıimdeý syndy ózekti máseleler talqylanyp, baıandamalar jasady. Sonymen qatar pedıatrııa tájirıbesinde sırek kezdesetin ártúrli klınıkalyq jaǵdaılar usynyldy. Sondaı-aq jas dárigerlerdiń ǵylymı jumystary men posterlik baıandamalary arnaıy kórmege qoıyldy.
Aınash ESALI, «Egemen Qazaqstan»
ALMATY