Halyqaralyq Túrki akademııasynyń (TWESCO) Astanadaǵy ortalyǵynda barsha túrki halqyna ortaq meıram - Naýryz merekesi toılandy.
Naýryz – ulyq meıram. Onyń tarıhy da tereńde. Iran men Turan jurtynyń tól merekesi. Atalmysh meıramnyń shyǵý tegi jaıly ataqty tarıhshy Rashıd ad-Dın (1247-1317) HIII ǵasyrda jazylǵan «Jamı at-taýarıh» atty qundy kitabynda: «Oǵyz hannyń násili El hannyń zamanynda túrkiler jaýsoqtylyqtan qashyp Ergene qon shatqalyna tyǵylyp qalady. Osynda tórt ǵasyr tapjylmaı jatady. О́sedi, ónedi, kóbeıedi. Kúnderdiń kúninde tereń quzdan shyǵatyn jol izdep, shatqaldyń jabylǵan aýzyn ashý úshin, 70 kórikten ot úrlep, temir qaqpany eritip, erkindikke shyǵady. Sol kúndi túrkiler «Ulystyń kúni» retinde toılaıdy» delingen. Joǵarydaǵy oqıǵamen úndes qazaq jyrshylary aıtqan: Dala nurǵa malyndy, Gúlden alqa taǵyldy, Qaǵandardy eske alyp, Tós pen balǵa soǵyldy, Kıeli alaý jaǵyldy.., deıtin shýmaqtar qazir halyq jadynda.
Osy oraıda, joǵarydaǵy ápsana-ańyzdy tiriltý ıdeıasy negizinde keshe Halyqaralyq Túrki akademııasynyń (TWESCO) ujymy halyqaralyq Naýryz merekesin atap ótip, sımbolıkalyq turǵydan tóske qoıylǵan temir soǵylyp, qasıetti alaý jaǵyldy.
Mańyzdy sharaǵa jınalǵan elshilik ókilderi men elordalyq zııaly qaýym aldynda sóz alǵan Akademııa basshysy Darhan Qydyráli myrza, qasterli merekemiz kóp jylǵy úzilisten keıin 1988 jyly ortamyzǵa qaıta oralǵanyn eldiń esine salyp, osy bir tarıhı oqıǵaǵa bıyl 30 jyl tolyp otyrǵan dataly sátimen mereke qonaqtaryn quttyqtady. Sonymen qatar Darhan Qýandyquly: «Astana tórinde bas qosqan Qazaqstan Respýblıkasy, Qyrǵyz Respýblıkasy, Tájikstan Respýblıkasy, Túrikmenstan, О́zbekstan Respýblıkasy Prezıdentteri dál osy Ulystyń uly kúni jaıly: «О́ziniń myńjyldyq tarıhynda Naýryz meıramy tabıǵattyń jáne qoǵamnyń qaıta túleýi men jańarýynyń, adamzat balasynyń rýhanı tazarýy men ózin-ózi damytýynyń nyshanyna aınaldy. Bul – ortaq ata-babamyzdan qalǵan uly mura. Biz ony saqtaýymyz jáne damytýymyz qajet. Naýryzdy toılaý kezeńi barlyq zamanda dostyq pen tatý kórshilik baılanystardyń nyǵaıýymen qundy. Bul ortaq tarıh, mádenıet, dástúr, turmys arqyly birikken elderimiz úshin qazir de mańyzdy. Osy meıram qarsańynda búkil óńirimizdiń qaýipsizdigin, turaqtylyǵy men ornyqty damýyn qamtamasyz etý maqsatymen óńirlik yntymaqtastyqqa, ózara qoldaýǵa, ózekti máselelerdi birlesip sheshýge nıet bildirýimizdiń zor sımvoldyq máni bar...» degen Ortalyq Azııa memleketteri basshylarynyń tarıhı málimdemesin de oraıly sátti paıdalanyp aıtyp ótti.
Mádenı sharaǵa arnaıy shaqyrylǵan memleket jáne qoǵam qaıratkeri Myrzataı Joldasbekov, qaýymdy kele jatqan Ulys kúni meıramymen quttyqtap, bul merekeniń bıyl qasıeti erejep aıymen tutasýyn jaqsylyqtyń nyshanyna balaıtynyn aıtqan saıasatker-ǵalym: «Naýryz áýeli tatýlyq meıramy. Tatýlyqtyń ózegi – birlik pen bereke. Bizdiń babalarymyzdan qalǵan eń úlken amanat da osy», dedi.
Qazaqtyń taǵy bir qadirli aqsaqaly Ádil Ahmetov óziniń álemdik geosaıasatqa baılanysty jazylǵan «Ǵasyr ǵıbaraty» atty eńbegin Akademııa kitaphanasyna tabys etse, Ázerbaıjan Respýblıkasynyń Qazaqstan Respýblıkasyndaǵy Tótenshe jáne О́kiletti elshisi Rashad Mamedov pen Vengrııa Respýblıkasynyń Qazaqstan Respýblıkasyndaǵy Tótenshe jáne О́kiletti elshisi Andrash Baranıler tolymdy sátti paıdalanyp, barsha qazaqstandyqtardy ulyq merekesimen quttyqtady.
Jıyn sońynda qonaqtar Akademııa ázirlegen naýryz dastarhannan dám tatyp, dástúrli saz ónerimen sýsyndady.
Beken QAIRATULY, «Egemen Qazaqstan»