Talaı tulǵalar túlep ushqan kıeli meken Túlkibas aýdanynyń ataýyn «Túrkibasy» dep ózgertý týraly usynys der kezinde kóterilip otyr. Elbasymyzdyń «Bolashaqqa baǵdar: rýhanı jańǵyrý» baǵdarlamasy aıasynda óńirimizdegi jer, sý attary tarıhı ataýlaryna qaıta qol jetkizip keledi. Osy baǵyttaǵy jumystar aldaǵy ýaqytta da jalǵasyn tabatyn bolady. Búgin bul týraly oblystyq máslıhattyń kezekti HI sessııasynda Ońtústik Qazaqstan oblysynyń ákimi Janseıit Túımebaev málim etti.
Sessııanyń jumysyn oblystyq máslıhat sessııasynyń tóraǵasy Dýlat Ábish júrgizip otyrdy. Sessııa jumysyna oblys ákimi, qala jáne aýdan ákimderi, aýdandyq, oblystyq aýmaqtyq departamentter men basqarmalardyń, uıymdardyń basshylary men BAQ ókilderi qatysty.
Oblystyq máslıhat sessııasynyń kún tártibinde negizgi 21 másele qaraldy. Atap aıtqanda oblystyq jer ınspeksııasy basqarmasy basshysynyń jerdiń paıdalanylýy men qorǵalýyn baqylaý jónindegi esebi, oblystyq máslıhat qyzmetin uıymdastyrý, depýtattardyń saýaldary men saılaýshylardyń ótinishteri boıynsha atqarylǵan jumystar jáne oblystyq máslıhat apparatynyń qyzmeti jónindegi esebi talqyǵa tústi. Sondaı-aq, oblys ákimdiginiń jergilikti memlekettik-jekeshelik áriptestik jobalarynyń iske asyrylý barysy týraly oblystyq ekonomıka jáne bıýdjetti josparlaý basqarmasynyń basshysy Arman Sabıtov baıandama jasady. Basqarma basshysy depýtattardan 21 jergilikti memlekettik-jekeshelik áriptestik jobalarynyń tizbesin bekitýdi surady. Onyń ishinde 3 qurylys, 2 avtomobıl joldary, 1 elektrmen qamtamasyz etý nysandary bar. Búginde atalǵan jobalardyń qujattamalary tolyq ázirlenip, tıisti saraptamadan ótken.
Sessııa barysynda azamattardyń jekelegen sanattaryna ambýlatorııalyq emdeý kezinde tegin dárilik zattardy qosymsha berý, respýblıkalyq onomastıka komıssııasynyń qaraýyna Ońtústik Qazaqstan oblysyndaǵy Túlkibas aýdanynyń ataýyn qaıta ataý jónindegi usynysy engizildi.
«Sońǵy jyldary bul másele birneshe ret kóterildi. Keńes zamanynda aýdannyń tarıhı aty burmalanǵany tarıhshy ǵalymdarǵa da belgili. Sondyqtan Túlkibasy ataýyn Túrkibasy dep ózgertý týraly usynysty biraýyzdan qoldaımyn. Atalǵan másele oblystyq ákimdik pen oblystyq máslıhat tıisti sheshim shyǵaryp, oblystyq onomastıkalyq komıssııada qaraldy. Sońǵy sheshimdi respýblıkalyq onomastıkalyq komıssııa qabyldaıtyn bolady», - dedi Janseıit Túımebaev.