Aıagózde úıin sý basqan 12 otbasy jańa páterge kirdi. Baspana kiltin oblystyń ákimi Danıal Ahmetov tapsyrdy.
Osydan týra toǵyz kún buryn Aıagóz qalasyndaǵy kishi Aıagóz ózeni arnasynan asyp, 100-den astam úıdi sý basyp, 8 úı múlde jaramsyz, 10 úı apatty dep tanylǵan edi. Alaıda arnaıy qurylǵan komıssııa keıin tasqynnan 189 úıdiń zardap shegip, 8 úıdiń qırap qalǵanyn, 32 úıdiń turýǵa jaramsyz ekenin anyqtaǵan-dy. Búgin oblys ákimi Danıal Ahmetov Aıagóz qalasyna arnaıy baryp, qarǵyn sýdyń kesirinen baspanasyz qalǵan 12 otbasyǵa páter kiltterin tabystady.
«Mine, qysqa merzim ishinde 49 mln 500 teńgege on eki úıdi satyp alyp, ózderińizge berip otyrmyz. Endi bir on kúnnen soń taǵy da 15 otbasyn páterlermen qamtamasyz etemiz be degen oıymyz bar. Sál sabyr saqtańyzdar. Sizderdiń osyndaı qýanyshty, rıza kóńildi júzderińizdi kórý biz úshin de bir baqyt. Kele jatqan Naýryz merekesi qutty bolsyn», - dedi aımaq basshysy.
Tabıǵattyń tosyn minezinen áp sátte baspanasynan aıyrylyp qalsa da, syn saǵatta eldiń, jergilikti bıliktiń qamqorlyǵyn, qoldaýyn sezingen Aıagóz turǵyndary aǵynan jaryla lebizderin jetkizdi. «Kúl dep edińiz mine, kúlip júrmiz. Siz tabıǵat apaty bastalǵannan beri ekinshi márte kelip tursyz. Bir apta ishinde talaı sharýa tyndyryldy. Oǵan halyq ta kýá. Jan-jaqtan azyq-túlik, kıim-keshek, qurylys materıaldary leg-legimen kelip jatyr. Myń da bir rahmet. Memleketke, Elbasymyzǵa, ózińińizge, jergilikti azamattarǵa alǵysymyz sheksiz», - dedi tilsiz jaýdan zardap shekken Aıagóz qalasynyń turǵyny Merýert Daýytbaeva.
Reti kelgende aıta keteıik, Aıagóz aýdanyna osy ýaqytqa deıin 34 mln 255 myń teńgeniń gýmanıtarlyq kómegi kórsetilipti. Oblystyq «Paryz» qorynan bólingen 100 mln teńgeni qosa alǵanda «Aıagóz Bolashaq» qaıyrymdylyq qoryna 169 mln teńge túsipti.
Azamat QASYM, «Egemen Qazaqstan»
Shyǵys Qazaqstan oblysy,
Aıagóz aýdany