Sý tasqynynan zardap shekken Aıagóz turǵyndaryna elimizdiń túkpir-túkpirinen kelip jatqan kómek kerýeniniń legi tolastar emes. Búgin Aıagóz qalasyna Astanadaǵy «Jasampaz» otandyq óndirýshiler konsorsıýymy ujymynyń joldaǵan gýmanıtarlyq járdemi kelip jetti.
Elimizdiń 13 óńiriniń 59 kásiporynynyń basyn biriktiretin mekeme «Qazaqstanda jasalǵan» belgisimen tabıǵattyń tosyn minezinen zábir kórgen turǵyndarǵa quny 7 mıllıon teńgeniń 4 myń dana tigin jáne trıkotaj ónimderin (eresekter men balalarǵa arnalǵan jyly kıimder, mektep formasy), 1 jarym myń dana tósek jabdyqtaryn, 1500 jup aıaq kıim jiberipti.
«Aıdyń-kúnniń amanynda qanshama turǵynnyń baspanasyz qalyp, keleńsiz kúıge túskeni elimizdiń bir azamaty retinde bizdiń de janymyzǵa batty. Ýaıymdadyq. Ujymmen aqyldasa kele Aıagóz turǵyndaryna kómek kórsetý jóninde sheshim qabyldadyq. Muqtajǵa járdemdesý, súringendi demeý, qaıyrymdylyq jasaý qanymyzda bar qasıet emes pe? «Bolashaqqa baǵdar: rýhanı jańǵyrý» maqalasynda Elbasymyz týǵan jerge, ósken elge, qorshaǵan ortaǵa qurmetpen qaraý ata-babamyzdan daryǵan ıgi dástúr ekenin atap ótken joq pa? Bizdiń kásiporyn otandyq ónimderdi damytýǵa erekshe kóńil bóledi. Halyqtyń osal toptaryna árkez járdemdesip otyramyz. Respýblıkalyq «Atamekenim» aksııasy aıasynda Aıagózge kıim-keshek, tósek jabdyqtarynan bólek materıalyq kómek retinde 1 mıllıon teńge jiberdik», - deıdi «Jasampaz» otandyq óndirýshiler konsorsıýymynyń atqarý keńesiniń tóraıymy Gúlmıra Ýahıtova.
Arqa tósinen joldanǵan qaıyrymdylyq kómekti aman-esen Aıagózge jetkizgen astanalyqtardy jergilikti turǵyndar qushaq jaıa qarsy alyp, alǵystaryn jetkizdi. «Aýdanymyzǵa elimizdiń túkpir-túkpirinen gýmanıtarlyq kómek kelip jatyr. Búgin mine Astanadan «Jasampaz» konsorsıýmynyń jibergen zattaryn qabyldap aldyq. Jyly kıimder men tósek jabdyqtary, mektep formasy tasqynnan zardap shekken turǵyndarǵa úlken járdem bolary anyq. Tabıǵattyń tosyn minezinen baspanasyz qalǵan, úıleri búlingen otbasylar alǵystaryn aıtyp jatyr», - deıdi Aıagóz aýdandyq Ishki saıasat bóliminiń basshysy Medet Myrzykeshov.
Astanadan kelgen kómekke turǵyndar da óz rızashylyqtaryn bildirdi. «Sonaý Astanadan at arytyp kelgen «Jasampaz» mekemesiniń ujymyna kóp rahmet. Osyndaı qıyn sátte qasymyzdan tabylǵanyna rızamyz. Tasqynnan zardap shekken turǵyndar atynan zor alǵysymyzdy bildiremiz», - deıdi tilsiz jaýdan zardap shekken turǵyndardyń biri Mádına Dáribaeva.
Azamat QASYM, «Egemen Qazaqstan»
Shyǵys Qazaqstan oblysy,
Aıagóz aýdany