Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda qoldanystaǵy kırıl jazýyn latyn grafıkasyna kóshirý jaıynda kósheli oı aıtyldy.
Júktelgen mindetti júzege asyrý maqsatynda ǵalymdar latyn grafıkasynyń qazaq tiline laıyqtalǵan nusqasyn jasaýǵa kirisken edi. Nátıjesinde, Prezıdenttiń arnaıy Jarlyǵy shyǵyp, 2025 jylǵa deıin kezeń-kezeńimen kóshetin latyn grafıkasy tańdalyp, jetildirilgen nusqa qabyldandy. Elbasynyń latyn tańbasyna kóshý týraly bastamasyn aldymen qoldaǵandar qatarynda Almaty oblystyq tilderdi damytý basqarmasy tur. Basqarma «Rýhanı jańǵyrý» baǵdarlamasynyń aıasynda «Jańa álipbı – jańa dáýir bastaýy» atty jumys tobyn quryp, aımaq turǵyndary arasynda túsindirý jumystaryn júrgizgen edi.
– Shara barysynda Jetisýdyń jetpisten astam eldi mekeninde jurtshylyqpen júzdesý uıymdastyryldy. Eseptesek, jalpy 12 000 adamnyń jańa álipbı týraly tolǵandyrǵan saýaldaryna jaýap berilipti. Iаǵnı jańa álipbıdi jetisýlyq áleýmet jappaı qoldaıdy dep senimmen aıta alamyn. Osylaısha Elbasy júktegen mindettiń bolashaq úshin jasalǵan mańyzdy qadam ekenin elge jetkizip, adamdardyń rızashylyǵyna ıe boldyq, – deıdi Tilderdi damytý basqarmasynyń basshysy Aıdar Bashbaev.
Basqarmanyń «Rýhanı jańǵyrý» baǵdarlamasy aıasynda qolǵa alǵan isteri jalǵyz bul emes. Ásirese til saıasatyn júzege asyrýdy ádebıet pen ónerdi qoldaý arqyly júzege asyrý baǵyty keń qoldaýǵa ıe boldy. Mysaly, ádebıettiń úsh býyn ókiliniń basyn qosatyn «Ádebıet – rýhanııattyń dińgegi» atty ádebı shara óte qyzyqty ótedi. Sol sııaqty basqarmanyń uıytqy bolýymen jarııalanǵan «Máńgilik eldiń muraty» atty aqyndar músháırasy da márege jetpekshi. Qazaqstan Jazýshylar odaǵymen birlesken taǵy bir rýhanı shara – jas ádebıetshilerdiń «Jetisý kóktemi» atty forýmy da qyr astynda. Osy sharalardyń barlyǵy da Elbasynyń «Bolashaqqa baǵdar: rýhanı jańǵyrý» atty maqalasy júktegen mindetterdiń jemisi.
Qalmahanbet MUQAMETQALI, «Egemen Qazaqstan»
Almaty oblysy