«Rýhanı jańǵyrý» baǵdarlamasyna sáıkes, eń aldymen «Sakraldy geografııa» arnaıy jobasyn iske asyrý sheńberinde sakraldy nysandardyń biryńǵaı tizbesin jasaý úshin tarıhı-mádenı nysandar týraly aqparat júıelendi.
Atqarylǵan jumystar qorytyndysy boıynsha óńirde 10 jalpyulttyq, 19 jergilikti mańyzy bar sakraldy nysandardyń tizbesi bekitildi. Oblystaǵy tarıhı mańyzy zor qasıetti oryndar týraly tolyq aqparattar oblystyq tarıhı-ólketaný mýzeıiniń saıtynda ornalasqan «Kıeli Qazaqstan» vırtýaldy kartasyna engizildi. Ol sonymen qatar áleýmettik jeliler paraqshalaryna da taratyldy.
– Búginde Qostanaı oblysynyń barlyq memlekettik mýzeıleriniń qorlaryn birtindep sıfrly júıege aýystyrý júrip jatyr. Ybyraı Altynsarınniń memorıaldyq mýzeıine mýltımedııalyq jabdyqtar, Qostanaı oblystyq tarıhı-ólketaný mýzeıine sensorlyq termınal satyp alyndy. Oǵan óńirdiń mádenı-tarıhı, tabıǵı muralary, ataqty jerlesterimiz týraly aqparatty molynan engizýge múmkindik bar, – deıdi oblystyq mádenıet basqarmasynyń basshysy Erlan Qalmaqov.
Oblysta ótken jyly arheologııalyq eskertkishterdi zertteý men júıeleýge mán berilip, oblystyq bıýdjet qarajaty esebinen 3 arnaıy ekspedısııa júrgizildi. Sonyń nátıjesinde Amankeldi aýdanyndaǵy – 200, Áýlıekól aýdanyndaǵy 51 arheologııalyq eskertkish týraly esep jasaldy. Áýlıekól aýdanynyń Belqaraǵaı eldi mekeninde qazba men dalalyq zertteý jumystary júrgizildi. Lısakov qalasyndaǵy Joǵarǵy Tobyl tarıhy men mádenıetiniń mýzeıi 2 ólketanýshylyq ǵylymı-jınaqtaý ekspedısııasyn uıymdastyrdy.
О́tken jyly Qostanaı oblysynda tek qostanaılyqtardy ǵana emes, jalpy respýblıka jurtshylyǵyn eleń etkizgen eki oqıǵa boldy. Qostanaı qalasynda batyr, mámileger Shaqshaq Jánibekke ornatylǵan eskertkish jáne Torǵaı óńirinde Keıki batyrdyń bas súıegin qasterlep týǵan jer qoınyna tapsyrý rásimi jáne qazaq halqynyń rýhanı báıtereginiń biri Ybyraı Altynsarınniń kesenesin qaıta jańǵyrtý ulttyq rýhty kótergen sharalar boldy.
Názıra JÁRIMBET, «Egemen Qazaqstan»
QOSTANAI