Osydan 122 jyl buryn, ıaǵnı 1896 jyly san ǵasyrǵa sozylǵan úzilisten soń Olımpıada qozǵalysy qaıta jandanyp, Grekııanyń bas shahary – Afınyda jazǵy jahandyq dodanyń alaýy tutanǵan edi. Jańa dáýirde tuńǵysh ret uıymdastyrylǵan baıraqty básekede 14 memlekettiń ókilderi óner kórsetti.
Fransııada týyp-ósken dańqty baron Per de Kýbertenniń bastamasymen tuńǵysh ret uıymdastyrylǵan Olımpııa oıyndarynda 241 sportshy baq synady. Básekeler aýyr atletıka, velosport, jeńil atletıka, júzý, kúres, nysana kózdeý, semserlesý, sporttyq gımnastıka jáne tennıs sekildi sporttyń 9 túrinen ótip, 43 júlde jıyntyǵyn sarapqa saldy.
10 táýlikke sozylǵan jarys qorytyndysy boıynsha AQSh quramasy aldyna jan salmady. Amerıkalyqtar 11 altyn, 7 kúmis jáne 2 qolany oljalady.
Grekııa sportshylary ekinshi orynǵa jaıǵasty. Jarys qojaıyndary 10 altyn, 17 kúmis jáne 19 qolany qorjynǵa saldy. Úshinshi orynda – Germanııa. Nemister 6 altyn, 5 kúmis jáne 2 qolany ıelendi. Sondaı-aq júlde alǵandar qatarynda Fransııa (5+4+2), Ulybrıtanııa (2+3+2), Vengrııa (2+1+3), Aýstrııa (2+1+2), Aýstralııa (2+0+0), Danııa (1+2+3) jáne Shveısarııa (1+2+0) quramalary bar.
Ejelgi Ellada elinde AQSh-tyń 28 jastaǵy óreni Djeıms Brendan Konnollı óz esimin tuńǵysh Olımpıada chempıony retinde sporttyq shejirege altyn áriptermen jazdy. Ol jeńil atletterdiń úsh qarǵyp sekirý saıysynda 13 metr 71 santımetrlik kórsetkishpen ózge qarsylastarynan qara úzip ketti. Odan bólek, Konnollı sol jarysta bıiktikke sekirýde – kúmis jáne uzyndyqqa sekirýde qola medaldi moınyna ildi.
Germanııalyq German Vaıngertner Afınyda eń kóp júldege ıelik etken sportshy retinde tarıhta qaldy. Sporttyq gımnastıkadan ótken jarysta 32 jastaǵy nemis jigiti 3 altyn, 2 kúmis jáne 1 qola medaldi enshilep, kórermenderdiń zor qoshemetine bólendi. Al Germanııanyń taǵy bir gımnasshysy 29 jastaǵy Karl Shýman 4 altyn medaldi keýdesinde jarqyratty.
Mine, jańa zamanda tuńǵysh ret alaýy tutanǵan jazǵy Olımpııa oıyndarynyń qysqasha tarıhy osyndaı.
Ǵalym SÚLEIMEN, «Egemen Qazaqstan»