2018 jylǵy 13 sáýirde QR ınvestısııalar jáne damý vıse-mınıstri Arystan Qabykenov Qazaqstandaǵy GFR Elshisi Rolf Mafaelmen kezdesti, dep habarlaıdy primeminister.kz.
Kezdesý barysynda saýda jáne ınvestısııalar salasyndaǵy yntymaqtastyqty odan ári damytý máseleleri talqylandy.
Vıse-mınıstr A. Qabykenov Germanııa Qazaqstannyń strategııalyq áriptesteriniń jáne iri ınvestorlarynyń biri ekenin aıtty. Ol sondaı-aq eki el arasyndaǵy taýar aınalymnyń oń qarqynyn atap ótip, saýda-ekonomıkalyq baılanystardy odan ári nyǵaıtýǵa, ózara múddeli salalarda eki jaqty yntymaqtastyqty keńeıtýge nıet bildirdi.
О́z kezeginde Elshi R. Mafael Qazaqstanda ınvestısııalyq ahýaldyń jaqsarǵanyn jáne germandyq bıznes qaýymdastyq Qazaqstan ekonomıkasyna ınvestısııa salýdy ári qaraı jalǵastyratynyn aıtty.
Sonymen qatar, kezdesý aıasynda taraptar bıylǵy jyly Qazaqstan jáne Germanııa jerlerinde josparlanǵan iri is-sharalardy talqylady, jáne Saýda-ekonomıkalyq yntymaqtastyq boıynsha Úkimetaralyq jumys tobynyń 12-otyrysyn jáne bıznes-forýmdy ótkizýge kelisti.
Kezdesý sońynda taraptar órbigen suhbat úshin alǵys bildirip, Qazaqstan men Germanııa arasyndaǵy qarym-qatynasty odan ári damytýǵa múdde tanytatynyn aıtty.