Joǵary marapatqa ábden laıyq

Úkimettiń tuńǵysh Prezıdentimizge zańdy negizde «Altyn Juldyz» ben «Otan» ordeni qosa beriletin «Halyq Qaharmany» ataǵyn tapsyrý boı­yn­sha «Qazaqstan Respýblıkasynyń Tuńǵysh Prezıdenti – Elbasy týraly» Konstıtýsııalyq zańǵa já­ne «Qazaqstan Respýblıkasynyń memlekettik nag­radalary týraly» Zańǵa tolyqtyrý engizý týraly usynysyn Parlament Senatynyń depýtattary biraýyzdan qoldap, tarıhı sheshim qabyldady. Bizdiń osylaısha barsha qazaqstandyqtardyń erik-jigerin bildire otyryp, álemdik saıası sahnada dara tulǵasymen, aıryqsha qarym-qabiletimen, zor aqyl-oıymen tanylǵan dara tulǵaǵa jan-jaqty qoldaý kórsetýimiz óte oryndy jáne solaı bolýy tıisti jáıt. Jurtshylyq Táýelsiz Qazaqstannyń Tuńǵysh Prezıdenti – Ult kóshbasshysyna degen shynaıy qurmetin árkez kórsetip keledi. Talaı ret joǵary memlekettik marapatqa usyndy da. Bul jolǵy sheshimniń jóni bólek. Bul zań elimizdiń Tuńǵysh Prezıdentiniń mártebesine ábden laıyq qarastyrylǵan der edim. Shynyna kelgende, Prezıdentimiz kez kelgen memlekettik marapatqa ábden laıyq. Munyń bári – 20 jyldyń ishinde zor ekonomıkalyq-áleýmettik órleýlerge jetkizip, ta­rıhtyń qıyn kezeńderinen din aman alyp shyqqan, búginde álemdegi órkenıetti elderge teńestirip otyrǵan Memleket basshysyna degen sheksiz qur­metimizdiń belgisi. Osynaý tarıhtyń qas-qaǵym sátindeı qysqa ýaqytta memleket quryp qana qoımaı, irgetasyn qalyptastyrý, bar qajyr-qaıratyn, kúsh-jigerin Otanyn gúldendirýge, adamdardyń turmys sapasyn jaqsartýǵa arnaý, osy jolda ulan-ǵaıyr ǵalamat ister atqarý tek bizdiń Elbasynyń ǵana qolynan kelse kerek. Syrtqy saıasatta Qazaqstannyń beıbit el retinde tanylýy, ekonomıkalyq, áleýmettik salalardaǵy tabystar – munyń bári Elbasy esimimen tyǵyz baılanysty. El birligin saqtap, adamdardyń konstıtýsııalyq quqyqtaryn qorǵaýda zor jumystar atqardy. Prezıdentimizge degen qazaqstandyqtardyń zor senimi men qurmeti eshqashan joǵalmaıdy. Otan al­dynda sińirgen orasan zor eńbegin esh umyt­paı­dy. Senat depýtattary osyndaı ortaq pikirge kelip, halyq kókeıindegi oıdy dóp basty. Muhtar ALTYNBAEV,  Parlament Senatynyń depýtaty.