Mańǵystaý oblysy Munaıly aýdany, Dáýlet aýylynda qazaq kúresinen 2004-2005 jyldary týǵan jasóspirimder arasynda aqıyq aqyn Tólegen Aıbergenovty eske alýǵa arnalǵan respýblıkalyq ashyq týrnır ótti.
Tuńǵysh ret uıymdastyrylyp otyrǵan týrnırge Ońtústik Qazaqstan oblysy, Atyraý, Aqtóbe, Qyzylorda, Mańǵystaý óńiri jáne Astana qalasynan 6 komanda qatysyp, barlyǵy 9 salmaq dárejesi boıynsha 220 sportshy chempıondyq ataqqa talasty.
Ashyq týrnır «Baıtaq mekenim» qoǵamdyq qory jáne Munaıly aýdany «Dáýlet aýyly balalar jáne jasóspirimder sport mektebi» memlekettik mekemesiniń uıymdastyrýymen ótti.
Týrnırdi uıymdastyrýshynyń biri, qazaq kúresinen bapker Qaırat Imanǵazıevtyń aıtýynsha, jarystyń maqsaty - aqıyq aqyn Tólegen Aıbergenovty eske alý, jasóspirimder arasynda qazaq kúresin damytý, salaýatty ómir saltyn nasıhattaý, sportshylardyń sheberligin arttyryp, úzdikterdi anyqtaý bolyp tabylady.
- Týrnırge qatysýshylar jaqsy daıyndyqpen kelgen. Olardyń arasynda bolashaǵynan zor úmit kúttiretinder kóp. Ásirese Syr óńiriniń sportshylary kórsetken ónerge tánti boldyq. Tóreshiler ádil baǵalaryn berdi dep oılaımyn. Sportshylar nemese bapkerler arasynda ózara túsinispeýshilikter týyndaǵan joq. Alda túrli jarystar kútip tur, kóp uzamaı solarǵa daıyndyqty bastaımyz. Jalpy bizdiń oblysta qazaq kúresi burynnan jaqsy damyǵan, bolashaqta Azııa jáne Álem birinshilikterinde top jaratyndar aýyldan shyǵady dep senemin jáne bolashaq chempıondardy daıyndaýda jumystana beremiz», - dedi ol.
Týrnırde barlyǵy 36 medal sarapqa salyndy, onyń 9 altyn, 9 kúmis jáne 18 qola. Sondaı-aq, jeńis tuǵyrynan kóringen árbir sportshyǵa jeke Kýboktan tabystaldy. Jeńimpazdar men júldegerler dıplom, medal, kýbokpen marapattaldy. Aıta ketý kerek, jarysqa qatysýshylar tarapynan respýblıka kóleminde tuńǵysh ret Mańǵystaýdan bastaý alǵan qazaq kúresinen aqıyq aqyn Tólegen Aıbergenovty eske alý týrnırin jylda ótkizip turý usynyldy. О́z kezeginde «Baıtaq mekenim» qoǵamdyq qory bul bastamany barynsha qoldaıtynyn jetkizdi.
Gúlaıym ShYNTEMIRQYZY, «Egemen Qazaqstan»