Jýyrda elordada Enactus Kazakhstan National EXPO 2018 stýdenttik kásipkerliktiń ulttyq kýbogynyń ıegeri anyqtaldy. Halyqaralyq kórme aýmaǵyndaǵy Kongress ortalyǵynda ótken dástúrli konkýrsta Semeıdiń Qazaq gýmanıtarlyq-zań ınnovasııalyq ýnıversıtetiniń stýdentteri jeńimpaz atandy.
Eki kúnge sozylǵan chempıonatqa elimizdiń 60-tan astam joǵarǵy oqý ornynan 700-den astam stýdent qatysty. Olar sıfrlandyrý, aýyl sharýashylyǵy, qarjy, áleýmettik salaǵa qatysty 100-den astam joba usyndy.
Kásipkerlik, startap, ınnovasııa baǵytynda ótken saıysta chempıon atanǵan komanda qaldyq túrlerin óńdeýge qatysty úsh túrli joba usynǵan. Úsh jobanyń ishindegi óndiristik qaldyqtardy turǵyn úı qurylysyna paıdalanýǵa arnalǵan Cane Home jobasy úzdik dep tanylypty. Osylaısha semeılik stýdentter ekinshi márte jeńiske jetip otyr. Endi olar elimizdiń namysyn AQSh-tyń Kalıfornııa shtaty San-Hose qalasynda qazan aıynda ótetin ótetin Enactus World Cup 2018 álemdik kýbogynda qorǵaıtyn bolady.
Taǵy bir aıta keterligi, osy konkýrsta Qazaq gýmanıtarlyq-zań ınnovasııalyq ýnıversıtetiniń komandasy qarjylaı syılyqty qanjyǵalaryna baılady. «Qazaqstandy qalaı azyqpen qamtımyz-3» degen taqyryptaǵy arnaıy saıysta jeńimpaz atanǵan komandaǵa 1 mıllıon teńge syaqy tapsyryldy.
Enactus Kazakhstan National EXPO 2018 ulttyq kýbogynda ekinshi orynda elordadaǵy Qazaq gýmanıtarlyq zań ýnıversıtetiniń komandasy ıelense, Astana qalasy Medısına ýnıversıteti úshinshi orynǵa taban tiredi. Almatydan kelgen Qazaq ulttyq agrarlyq ýnıversıtetiniń komandasy tórtinshi oryndy qanaǵat tutty.
Jyl saıyn álemniń túrli erlerinde ótetin, qorytyndy konkýrsqa 36-dan astam memleketten kelgen oqý oryndarynyń komandalary qatysatyn Enactus jobasynyń aqtyq kezeńi AQSh-ta ótetinin joǵaryda aıtyp óttik. Bul jobanyń maqsaty jastardyń kúsh-jigerin, bilimin, ıdeıalaryn paıdalanyp kásipkerlikti damytý, jastardy áleýmettik-ekonomıkalyq salaǵa belsendi túrde tartý bolyp tabylady.
Arnur ASQAR,
«Egemen Qazaqstan»