Elbasy Nursultan Nazarbaev Qazaqstan Respýblıkasy prokýratýra organdarynyń qyzmetkerleri men ardagerlerin kásibı merekeleri – Prokýratýra qyzmetkerleri kúnimen jáne Táýelsiz Qazaqstan prokýratýrasy organdarynyń qurylýyna 20 jyl tolýymen quttyqtady.
«Bul merekelerińiz bıyl Qazaqstan Respýblıkasy Táýelsizdiginiń 20 jyldyǵymen tuspa-tus kelip otyr. Osy jyldarda sizderdiń vedomstvolaryńyz elimizdegi zańdylyq pen quqyqtyq tártipti qamtamasyz etýde memlekettiń berik te senimdi tiregine aınaldy.
Prokýratýra qyzmetkerleri qoǵam men memlekettiń múddesin saqtaýdy qorǵaýda jáne elimizdiń quqyqtyq turaqtylyǵyn qamtamasyz etýde óziniń jaýapty mindetin abyroımen júzege asyrýda. Aldaǵy kezde de sizderdiń qyzmetterińizdiń basty baǵyttary azamattardyń konstıtýsııalyq quqyqtaryn qamtamasyz etý, Qazaqstan memlekettiligin, elimizdiń ekonomıkalyq qaýipsizdigin nyǵaıtý, qylmyspen jáne sybaılas jemqorlyqpen aıaýsyz kúres júrgizý, elimizde qolaıly iskerlik ahýaldy qamtamasyz etý bolyp qala beredi. Prokýratýra árdaıym biryńǵaı quqyqtyq keńistik pen qoǵamdaǵy quqyqtyq mádenıettiń negizi bolýy tıis», delingen quttyqtaýda.
Memleket basshysy ári qaraı joǵaryda atalǵan mindetterge baılanysty prokýratýra qyzmetkerleriniń ózderiniń kásibı biliktiligin udaıy jetildirip otyrýynyń, mindetterin kirshiksiz, adal atqarýynyń qoǵam úshin mańyzy orasan zor ekenin atap kórsete kelip, olardyń árdaıym osy mindetterdiń údesinen shyǵatynyna senetinin bildirgen.
Elbasy quttyqtaýynyń sońynda atalǵan sala qyzmetkerleri men ardagerlerine zor densaýlyq pen baqyt, asa jaýapty qyzmette mol tabystar tileıdi.