Sáýir aıynyń 23-25-i aralyǵynda ótken «Skotokrad» respýblıkalyq jedel-profılaktıkalyq sharasy kezinde oblysta 30 mal urlyǵy oqıǵasy tirkeldi. Onyń ishinde buryn oryn alǵany da, burnaǵy jyldary urlyq ta, jaqynda urlaǵany da bar. Oblystyq ishki ister departamenti qyzmetkerleri ótkizgen jedel profılaktıkalyq shara kezinde mal urlyǵymen aınalysqan topty ustady. Olardyń keltirgen zııany 5 mıllıon teńgeden asady.
Amankeldi aýdanyndaǵy jergilikti polısııanyń ýchaskelik ınspektory toqtatqan «Folksvagen» jeńil mashınasynyń bagajynan jańa soıylǵan sıyrdyń eti shyqqan. Mashına ıesiniń ol etti qaıdan alǵany týraly qujattary bolmaǵan. Mashına aıdap kele jatqan 36 jastaǵy jigittiń jaıylymdaǵy sıyrdy soıyp ákele jatqany belgili boldy. Sıyr jergilikti 53 jastaǵy turǵynnyń maly ekendigin de polıseıler anyqtady. QR QK «Urlyq» 188 baby boıynsha qylmystyq is qozǵaldy.
Polıseıler Áýlıekólden 14 mal urlyǵyn tirkedi. Barymtashylar iri qara urlaýdy Meńdiǵara, Qostanaı, Denısov, Fedorov aýdandarynda da «óristetken». Ustalǵandardyń túsindirýinshe, barymtashylar bir aýylǵa keledi de, kóligin aýyldyń syrtyna tastap, ózderi jurttyń saraıyn baqylaıdy. Qoradaǵy sıyrdy aýyldyń syrtyna aıdap shyǵady da, soıyp, jiliktep alyp ketedi. Olar ony Qostanaıǵa ákelip, kelisim boıynsha et satatyn dúkenderge ótkizedi. Tómen baǵamen ótkizedi de, aqshasyn qolma-qol alady.
Jedel-profılaktıkalyq shara kezinde ustalǵan toptaǵy barymtashylardyń barlyǵy da 1991 jylǵy tepse temir úzetin jigitter. Ekinshi 6 adamnan turatyn qylmystyq topty polıseıler Fedorov aýdanynan ustady. 21-27 jas aralyǵyndaǵy jigitter aýdan óńirinde 13 ret urlyq jasaǵan, sonyń ekeýi mal urlyǵy, qalǵany úı men dúkendi tonaǵan.
Názıra Járimbet,
«Egemen Qazaqstan»
Qostanaı