Keshe Astanada «Kórme» ortalyǵynda «Qazaqstannyń úzdik taýary-2011» respýblıkalyq kórme-konkýrsynyń ashylý saltanaty ótti. Oǵan Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev qatysyp, quttyqtaý sóz sóıledi.
2001 jyly belgilengen «Qazaqstannyń úzdik taýary» kórme-konkýrsy óz óniminiń sapasyn damytýda úlken nátıjelerge qol jetkizip, sapa menedjmenti júıelerin oıdaǵydaı engizgen otandyq taýar óndirýshilerdi qoldaý maqsatynda qurylǵan. El Táýelsizdiginiń 20 jyldyǵyn toılaý jylynda úzdik taýarlar kórmesi respýblıka ónerkásibi jetistikterin pash etýde. Atalǵan kórme-konkýrsqa baıqaýdyń óńirlik kezeńderinen ótip jeńimpaz atanǵan 150- den astam eń myqty degen qazaqstandyq taýar óndirýshiler qatysyp otyr. Olardyń qatarynda ulttyq saz aspaptaryn jasaýda úzdik nátıje kórsetip, halyqtyń ystyq yqylasyna bólenip júrgen almatylyq «Sherter» JShS da bar. Seriktestik dırektory Baqytjan Dilmanov tapsyrys boıynsha da jáne bólshek saýdaǵa da óz sheberlerimen dombyradan saz syrnaıǵa deıin aspaptar jasap, ony elimizdiń birneshe aımaqtaryna shyǵaryp jatqandyqtaryn aıtady. Sonymen birge ol alys-jaqyn shetelderde turatyn qandastar tilegin qanaǵattandyratyndyqtaryn da nazardan tys qaldyrmady. Al Shyǵys Qazaqstan oblysynan kórmege arnaıy at aryltyp kelgen et, shujyq ónimderimen aty shyqqan «Shvabskıe kolbaskı» seriktestiginiń ónimderi qaraǵan jandy tamsantpaı qoımaıtyndaı. Kásiporynnyń semeılik ókildiginiń dırektory Gúlsara Kópbaeva ónimderimen Almaty, Taldyqorǵan, Semeı, О́skemen óńirlerin qamtamasyz etip otyrǵandyqtaryn aıta kele, baıqaý-kórmeden kúter úmitteriniń mol ekendikterin jetkizdi.
Konkýrs komıssııasy «О́ndiristik maqsattaǵy úzdik taýarlar», «Halyq tutynatyn úzdik taýarlar» jáne «Úzdik azyq-túlik taýarlary» syndy úsh nomınasııada jeńimpazdardy anyqtamaq. Baıqaý jeńimpazdary «Altyn sapa» men «Paryz» syılyqtarynyń laýreattarymen birge 9 jeltoqsanda ótetin Indýstrııalandyrý kúni marapattalmaq.
Ábdirahman QYDYRBEK.