«Robofest»-ke jasy 6-17 jas aralyǵynda 100 jýyq úmitker qatysty. Is-sharany oblystyq bilim basqarmasy «QazRobotıks» Federasııasynyń qoldaýymen uıymdastyryp otyr.
Jas tehnıkter 4 kategorııa boıynsha jarysty: syzyq boıymen jarys kegelrıng – kvadro, robosýmo jáne robofýtbol. Robosýmo kategorııasynan birinshi oryndy qazalylyq oqýshy Kemal Serik ıelendi. Kegelrıng-kvadro jarysynan qyzylordalyq Baqytbek Jandaýlet pen Saılybaev Asylhan jeńis tórinen kórinse, syzyq boıymen jarystan Iskendir Maǵjan men Abdýllaev Oralbek jeńimpaz atandy.
Jeńimpazdar dıplom jáne baǵaly syılyqtarmen (sandyq quraldar men orgtehnıkamen) marapattaldy.
Sondaı-aq, festıval aıasynda qatysýshy muǵalimderge arnalǵan sheberlik synyptar ótkiziledi.
Oblys ákiminiń orynbasary Rýslan Rústemov festıvalge qatysýshylardy marapattap, aımaqta IT-salasy men sıfrlandyrý boıynsha barlyq qajetti sharalar qabyldanyp jatqanyn aıtty.
«Salanyń mańyzdylyǵyn eskere otyra, biz 2017 jyldan bastap oblystaǵy 9 oqýshylar úıinde robototehnıka úıirmelerin ashyp, «3D zerthanalarymen» jabdyqtaýdy qolǵa aldyq. Sondaı-aq, 25 ınnovasııalyq mektepte robototehnıka elektıvti kýrs retinde eńgizildi. Elbasynyń bıylǵy halyqqa Joldaýynda qoǵamnyń barlyq salalaryn sıfrlandyrý, zamanaýı tehnologııalardy endirý jaıynda keńinen aıtylǵany belgili. Biz jańa HHI ǵasyrdyń munaıy – bilim, aqparat, sandy tehnologııalar ekenin jaqsy túsinýge mindettimiz!», - dedi R.Rústemov.
Aıta keteıik, qazirgi tańda oblystaǵy 9 qosymsha bilim berý uıymdarynda 316 jas óren robotehnıka úıirmesine qatysyp, tálim alýda.
Esterińizge sala keteıik, ótken jyly jeltoqsan aıynda HackDay 2017 alǵashqy aımaqtyq festıvali uıymdastyryldy, oǵan 137 komanda qatysty. Qatysýshylardyń ıedıalary, tipti, Almatydan, Astanadan kelgen ınvestorlar qyzyǵýshylyq tanytýda.