Qazaqstandyq aktrısa Samal Eslıamova Kann kınofestıvalindegi jeńisi týraly «Vechernıaıa Astana» gazetine suhbat berdi.
- Kartınany túsirýge jeti jylǵa jýyq ýaqyt ketipti. Osy kezeń arasynda sizge eń qıyn bolǵany ne?
- Fılmde kóteriletin taqyryp jeńil taqyryp emes. Bul psıhologııalyq drama, sol sebepti túsirilim kezinde qıynshylyqtar boldy. Men óz jumysymdy óte qatty jaqsy kóremin, ol maǵan rýhanı lázzat syılaıdy. Dál osy qasıet jáne rejısserdiń shyǵarmashylyq áleýetine degen senim maǵan kúsh berdi. Bul týyndyda men somdaǵan keıipker kadrdyń 99,9 prosentinde boldy.
- Samal, qazirgi kóńil kúıińizben bólisseńiz?
- Múmkin, áli osy júldeni jeńip alǵanymdy sezine almaı jatqan shyǵarmyn. Bári tús sekildi. Bul óte tamasha sezim. Bizdiń barlyq shyǵarmashyyq ujym eń joǵarǵy júldeni alý úshin aıanbaı eńbek etti, sol úshin barymyzdy saldyq.
- Siz júlde tapsyrý rásiminde ulttyq nyshandary bar erekshe kóılekpen shyqtyńyz. Ony tańdaýǵa kóp ýaqyt jumsadyńyz ba?
- Meniń oǵan ýaqytym múlde bolmady. Árıne, men ulttyq kıimmen shyqqym keldi. Ol úshin Qazaqstanǵa kelip, ólshep kórý kerek edi. Qaıtalap aıtam, bos ýaqyt múlde bolǵan joq. Biz bizdiń otandastarymyzdyń - qazaqstandyq prodıýsserlerdiń kómegimen túrli obrazdardy qarap kórdik te, osyǵan toqtaldyq. Bul kóılekti maǵan Máskeýge ákelip berdi.
- Myqty básekelesterińiz bolǵany úshin qobaljyǵan sátińiz boldy ma?
- Shynymdy aıtsam, festıvalge qatysyp jatqan barlyq fılmdi qaraýǵa murshamyz bolmady. Alaıda biz jankeshtilikpen eńbek ettik, bar jigerimizdi jumsap, jeńiske jetýge umtyldyq.
- Barsha oqyrmandarymyzdyń atynan sizdi tarıhı jeńisińizben quttyqtaımyz, Samal. Suhbatyńyz úshin alǵys aıtamyz.