Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy Qaryz týraly kelisimdi (Orta bilim berýdi jańǵyrtý jobasy) ratıfıkasııalaý týraly» zań jobasy qaraldy.
Qaryz týraly kelisimge 2017 jylǵy 21 tamyzda Astana qalasynda qol qoıylǵan bolatyn. Qujat Memleket basshysy N.Á. Nazarbaevtyń bes ınstıtýsıonaldyq reformasyn iske asyrý jónindegi «Ult jospary – 100 naqty qadamnyń» 76-qadamyndaǵy, sondaı-aq Qazaqstan Respýblıkasynda bilim berýdi jáne ǵylymdy damytýdyń 2016 – 2019 jyldarǵa arnalǵan memlekettik baǵdarlamasynda belgilengen basymdyqtarǵa sáıkes keledi.
Orta bilim berýdi jańǵyrtý jobasy boıynsha shyǵyndardyń jalpy somasy 75 mıllıon AQSh dollaryn, onyń ishinde Halyqaralyq Qaıta Qurý jáne Damý Bankiniń qaryzy 67 mıllıon AQSh dollary mólsherinde, qaryzdy respýblıkalyq bıýdjetten qosa qarjylandyrý 8 mıllıon AQSh dollary mólsherinde quraıtyn bolady.
Halyqaralyq Qaıta Qurý jáne Damý Bankiniń 67 mıllıon AQSh dollary somasyndaǵy qaryzy Qazaqstan Respýblıkasyna 5,5 jyl jeńildik kezeńin qosa alǵanda, 17 jyl óteý merzimine beriledi, syıaqy mólsherlemesi – LIBOR + qubylmaly spred, birjolǵy komıssııa – qaryz somasynyń 0,25 paıyzyn, rezervke qoıǵany úshin komıssııa – jylyna qaryz boıynsha paıdalanylmaǵan balansynyń 0,25 paıyzyn quraıdy.
Kelisimniń maqsaty orta bilim berý júıesiniń sapasyn arttyrý, jańǵyrtýdy qoldaý, bilim berýdegi qoljetimdilik pen tepe-teńdikti arttyrý bolyp tabylady.
Kelisim UBT testeýdiń jańa standarttaryn qalyptastyrý arqyly baǵalaý júıesin, oqýdaǵy jetistikterdi syrtqy baǵalaýdy jáne test tapsyrmalarynyń bazasyn jańartýdy qaıta qaraý sııaqty bilim berýdiń jańartylǵan mazmunyn qoldaýǵa baǵyttalǵan bastamalar keshenin qamtıdy.
Kelisimniń basty baǵyttarynyń biri bilim berý materıaldaryna qoljetimdilikti arttyrý, mýltımedııalyq jabdyqpen jaraqtandyrý jáne aýyl muǵalimderiniń áleýetin ulǵaıtý arqyly aýyldyq jalpy bilim beretin jáne shaǵyn jınaqtalǵan mektepterdegi oqýshylardyń úlgerimin jaqsartý bolyp tabylady. Kelisimniń jalpy qarjylandyrý somasynyń shamamen 67 paıyzy 5400 aýyldyq mektepti ınteraktıvti jabdyqpen qamtamasyz etýge jumsalatyn bolady. Aýyldyq mektep kabınetteriniń 60 paıyzyn kompıýterlermen, proektorlarmen jáne ekranmen jaraqtandyrýǵa múmkindik beretin 32,5 myń jabdyq jınaqtalymyn satyp alý josparlanyp otyr.
Menedjment boıynsha oqytýmen aýyldyq jerlerdegi mektepterdiń shamamen 200 myń muǵalimderi men basshylary qamtylýǵa tıis. 3 mıllıonnan astam oqýshy, onyń ishinde erekshe bilim berilýine qajettiligi bar balalar Kelisimniń bas benefısıarlary bolady.
Kelisim ınklıýzıvti bilim berýdi qoldaýǵa da baǵyttalǵan. Jalpy bilim beretin mektepter negizinde 9 Resýrstyq ortalyq qurý jáne olardy jaraqtandyrý, defektologterdiń, psıhologııalyq-medısınalyq-pedagogıkalyq konsýltasııalar beretin mamandardyń biliktiligin arttyrý, kórý qabileti jáne ıntellekti buzylǵan balalar úshin oqýlyqtar satyp alý josparlanyp otyr.
Kelisimdi iske asyrý aýyldyq jáne qalalyq mektepterdiń arasyndaǵy úlgerimdegi alshaqtyqty qysqartýǵa jáne bilim berý sapasyn teńdestirýge yqpal etýge tıis.
Zań jobasy Palatanyń qaraýyna jiberildi.