Ál-Farabı atyndaǵy Qazaq Ulttyq ýnıversıtetinde «Túlekter kúni» atalyp ótti. Bul merekelik sharaǵa beligili qoǵam qaıratkerleri men zııaly qaýym ókilderi, atylmysh bilim ordasynyń qyzmetkerleri men stýdentteri jáne ár jyldary osy qasıetti qara shańyraqtyń qabyrǵasynan túlep ushqan túlekter qatysty.
«Túlekter kúni» osy bilim ordasynyń rektory, akademık Ǵalym Mutanovtyń bastamasymen 2010 jyldan beri atalyp keledi. Urpaqtar sabaqtasty, olardyń birlesýi men túlekter baýyrlastyǵynyń ozyq dástúrleri jalǵastyǵynyń sımvoly ispettes osy ıgi shara bıyl da QazUÝ qalashyǵynda ornalasqan «Máńgilik El» qaqpasy aldynda bastaldy. Jıynǵa qatysýshylardyń qarasy mol boldy. Dástúr boıynsha birlik pen yntymaqty, turaqtylyq pen berekeni aıqyndaıtyn «Taıqazan» jáne ál-Farabı alańyndaǵy «Máńgilik El» sýburqaqtary iske qosylyp, Shyǵystyń uly ustazynyń eskertkishi men qazaqtyń kórnekti ǵalymy О́mirbek Joldasbekovtiń monýmentine gúl shoqtary qoıyldy.
Saltanatty rásimniń negizgi bólimi О́.Joldasbekov atyndaǵy Stýdentter saraıynda ótti. Bul jıynda rektor Ǵalym Mutanov baıandama jasasa, «Túlekter qaýymdastyǵy» kópshilik aldynda esep beredi. Ár jyldary osy qara shańyraqta bilim alǵan belgili qoǵam qaıratkerleri men zııaly qaýym ókilderi ýnıversıtettiń tarıhy men jetistigine qysqasha toqtala kele, talaı tartymdy áńgimelerdiń tıegin aǵytty. «Túlekter kúni» merekesinde 2018 jyldyń úzdik túlekterine Qurmet gramotasy, kafedralarǵa qundy syılyqtar beriledi.
Sonymen qatar QazUÝ qalashyǵynda «Máńgilik El» arhıtektýralyq keshendi stelany turǵyzýǵa aksııa jarııalandy. Endi aldaǵy ýaqytta osy baǵytta qyzý jumystar júrgizilý kózdelýde. Bul stela 2019 jyly Ýnıversıtettiń 85 jyldyǵy jáne «Túlekter qaýymdastyǵynyń» 25 jyldyǵynda mesenattar men jurtshylyqtyń qatysýymen saltanatty túrde ashylady.
Ǵalym SÚLEIMEN,
«Egemen Qazaqstan»
ALMATY