Jas aqyn ári aýdarmashy, respýblıkalyq qoǵamdyq-saıası «Prezıdent jáne halyq» gazetiniń tilshisi Baýyrjan Segizbaev qurastyrǵan «Kemeńger kelbeti» atty antologııalyq jınaqtyń tusaýkeser rásimi ótkizildi. Onda Elbasy Nursultan Nazarbaevtyń eli men halqyna qyzmeti jan-jaqty ashyp kórsetilgen.
Qazaqstan Táýelsizdigine 20 jyl tolýy mereıli merekesi qarsańynda kóptegen jańa óndiris oryndary men ǵımarattar boı kóterýde. Munyń barlyǵy da Elbasynyń sarabdal saıasatynyń arqasynda júzege asyp jatqan sharýalar. «Kemeńger kelbeti» kitaby arqyly Táýelsizdik pen Elbasynyń elimizdiń órkendeýine qosqan súbeli úlesin jan-jaqty ashyp kórsetý maqsaty qoıylǵan. Ol sátti shyqqan. B.Segizbaev óziniń bul jınaǵyna ár túrli basylymdarda jaryq kórgen Qadyr Myrza Álı men Tumanbaı Moldaǵalıev bastaǵan arqaly aqyndardan bastap jas aqyn Jambyl Dúısenovtiń óleńderin kirgizipti. Sondaı-aq jınaqta Qazaqstan Respýblıkasynyń Tuńǵysh Prezıdenti, Ult kóshbasshysy Nursultan Ábishuly Nazarbaev jaıly elge tanymal sazgerlerdiń, kúıshilerdiń notalary da toptastyrylyp otyr eken.
Antologııalyq jınaq jastardy patrıotızmge, otansúıgishtikke tárbıeleıdi. Kitap kópshilik oqyrmanǵa arnalǵanymen, ásirese, onyń mektep oqýshylaryna da bereri mol. Qazaqstan men Elbasy egiz uǵym bolyp ketkendikten, aǵa urpaqtyń kórnekti ókilderiniń pikirleri de qosa berilipti.
Jınaq eki taraýdan turady. «Júrekjardy jyr» degen birinshi taraýǵa, aty aıtyp turǵandaı, jyr men óleńder jáne poemalar toptastyrylsa, «Áýelegen án – kúmbirlegen kúı» atty ekinshi taraýda Elbasynyń kórkem kelbeti ásem án men kúmbirlegen kúı arqyly árlengen. Jınaq osynysymen de qundy sanalady. Muny jastardyń el Táýelsizdiginiń 20 jyldyǵyna syılaǵan tartýy dep te qaraýǵa bolar.
«Jas Otan» jastar qanatynyń atqarýshy hatshysy Nurlan О́teshev tusaýkeser rásiminde óziniń ózekjardy pikirin ortaǵa saldy. «Biz Elbasyn maqtamaımyz, biz onymen maqtanamyz. Qazirgi kezde osyndaı kitaptar aýadaı qajet. Tek jastarǵa ǵana emes, mektep oqýshylaryna da iri tarıhı tulǵa týraly kóptegen maǵlumattar berýimiz qajet», dedi N.О́teshev.
Kitaptyń tusaýkeserine arnaıy kelip qatysqan jastar jaǵy bul lebizge kádimgideı jelpinip qaldy. Osy rette Nurlan О́teshev dıplommen aýylǵa ketken jastardyń Astanada basyn qosyp, arnaıy marapattaǵandaryn aıtty. Ol sol jastardyń 90 paıyzynan astamy muǵalim ekenin, eger osy kitapty olarǵa ádisdemelik qural retinde tapsyrsa oryndy bolar degen tilegin de eskerte ketti.
Atalǵan sharanyń ótýine Jýrnalıster odaǵynyń Astana qalalyq bólimshesi men «Jas Otan» jastar qanaty muryndyq bolǵandyǵyn aıta ketý kerek. 300 betten turatyn kitaptyń jalpy taralymy 5 myń dana.
Asqar TURAPBAIULY.