«Kókshetaý mıneraldy sýlary» aksıonerlik qoǵamyn jergilikti turǵyndar osylaı ataıdy
Jemisti 20 jyl
Bizdiń kásipornymyz Qazaqstan táýelsizdigi jarııalanǵan 1991 jyly qurylǵanyn maqtan etemiz. Onyń qaınar bastaýynda kókshelik azamat, jergilikti bıznes maıtalmandarynyń biri Asqar Qazynabıuly Álıevtiń turǵanyn jerlesterimiz zor qurmet sanaıdy. Jas geolog jigitter kúrmeýi qıyn kezeńde soltústik óńirde buryn bolyp kórmegen sýsyn óndirisin qolǵa alǵany erlikke tatıtyn qubylys desek te bolady.
Geologııalyq zertteýlerdiń nátıjesinde Qoshqarbaı jáne Býrabaı qoınaýynan baǵaly qaınarlar tabylyp, aldymen «Qulager Arasan», 1996 jyly «Turan» sýlary shyǵaryla bastady. Alkogoldi ónimder qatary da molaıa tústi. Zaýytqa myńnan astam adam jumysqa tartylyp, olardyń tabysy da tolyǵý ústinde. Kásiporynnyń qýattanýy básekelestik arnasyndaǵy naryq qatynastaryn keńitti. Bizdiń marketıng jáne ónimdi taratý qyzmetiniń izdenisteri nátıjesinde 2001-2007 jyldar aralyǵynda Astana, Qostanaı, Petropavl, Almaty, Pavlodar, Ekibastuz, Semeı jáne О́skemen qalalarynda fılıaldarymyz ben ókildikterimiz ashyldy. Qazirgi kúni elimizdiń soltústik ortalyq aýmaǵynda 10 fılıalymyz, Batys jáne Ońtústik Qazaqstanda 9 dıstrıbıýterlik júıemiz, sondaı-aq, kórshiles Reseıde saýda ókildigimiz jumys isteýde.
Aksıonerlik qoǵam sońǵy tórt jylda tehnıkalyq jáne tehnologııalyq jańǵyrtýlarǵa aıryqsha den qoıýda. Zaýytymyzdyń óndiristik alańdary eleýli ulǵaıyp, avtomatty júıe qalyptasty. Zerthanalarymyz zamanalyq quraldarmen jabdyqtalǵan. Osynyń nátıjesinde tutynýshylarymyzǵa ónimderimizdiń júzden astam túrin usynyp otyrmyz.
Zaýytta ónimder bes jelilik sıpatqa biriktirilgen. Ásirese, Germanııanyń «Krones» fırmasynyń alkogolsiz sýsyndar quıý júıesi ortaq maqtanyshymyz sanalady. Ol saǵatyna 12 myń shólmek shyǵaratyn qýatqa ıe. Údemeli ındýstrııalyq-ınnovasııalyq damý baǵdarlamasy sheńberinde, nebary 10 aılyq rekordtyq merzimde, bıylǵy shilde aıynda paıdalanýǵa berilgen jeli jetistikterimizge serpin bergeni aıqyn. Sondaı-aq, osy joba aıasynda Qazaqstanda birinshi bolyp sýdy mıkrobıologııalyq súzgiden ótkizetin «Pall» qondyrǵysy ornatylǵanyn aıta ketýimiz jón.
Jalpy, zaýytymyzdyń jylyna 45 mıllıon lıtr alkogolsiz jáne 1,5 mıllıon spırtti ónimder shyǵaratynyn eskersek, ekonomıkalyq-áleýmettik jetistikter rezerviniń keńdigin ańǵarýǵa bolady. Bul óndiristi nyǵaıtýǵa 880 mıllıon teńge ınvestısııalyq qarjy salynǵanynyń arqasy deýimiz kerek. Túpki qaıtarym da kóńildegideı. Jyl saıyn 9 mıllıard teńgeniń ónimin saýda aınalymyna túsiretin kásiporyn jyl ishinde 2,5 mıllıard teńgeni salyq túrinde aýdaryp otyr.
Osynaý irgeli kórsetkishterimiz «Kókshetaý mıneraldy sýlary» aksıonerlik qoǵamynyń nyq qadamdaryn aıqyndaıdy. Qazaqstan Táýelsizdiginiń 20 jyldyǵy onymen qurdas kásiporynǵa kóptegen mindetter men jaýapkershilik júkteıtinin túsinemiz. Sondyqtan, yntymaqty ujymymyz el mereıin eseleý jolynda ekpindi isterimen tanyla beretini sózsiz. Kók baıraqty elimizdiń basty merekesi qutty bolsyn, qadirli otandastar!
Aleksandr SAMOILOV, «Kókshetaý mıneraldy sýlary» AQ prezıdenti.
Maqsat – tirshilikti shyraılandyrý
Qalamyzda jurtshylyq “áleýmettik qolaılylyq araly” atap ketken kásiporyn bar. Ol – “Kókshetaý mıneraldy sýlary” aksıonerlik qoǵamy der edik.
Másele túpki nátıjede desek, sonyń bir mańyzdy tarmaǵy – áleýmettik turpattaǵy kásiporynnyń adamdar tirshiligin shyraılandyrýdaǵy oń qadamdarynan kórinis beredi. Respýblıkamyzda áleýmettik-kásipkerlik korporasııalar týraly pikir pisip-jetilip, Elbasy Joldaýyndaǵy basty mindetke aınalsa, kókshelik kásiporyn bul baǵytty ózi qurylǵan 1991 jyldan beri ustanyp keledi desek, esh artyqshylyǵy joq. Osyndaǵy 1000 adamnyń bir baýyrǵa aınalyp, kásiporynnyń otyzǵa jýyq halyqaralyq dıplomdy jeńip alýy, Elbasymyzdyń ujymdaǵy jaqsy umtylystarǵa tánti bolýy sózimizdiń dáleli ispetti. AQ dırektorlar keńesiniń tóraǵasy Asqar Álıev kásipkerlik qozǵalystaǵy tabys jıyntyǵy qarapaıym qaǵıdattardy saqtaýdan quralatyndyǵyn aıtady. Máselen, úsh shart múltiksiz oryndalýy tıis. Tek qana sapaly ónim shyǵarý, ekinshiden, salyq pen basqa da ótemderdi tóleý tártibin qatań saqtaý, osy arqyly memleketti qoldaý, úshinshiden, óndiristik múlik pen jabdyqtardy muqııat ustaýmen birge, eńbek ujymyna áleýmettik kómek kórsetip, qamqorlyq aıasyn keńitý. Naryqtyq qatynastardy nyǵaıtyp, bıznes álemin ajarlandyrýdyń budan basqa kilti joq.
Máselen, 2005 jyly kásiporynnyń áleýmettik paketi 40 mıllıon teńgeni qurasa, bıyl bul eki eseden asty. Onyń ústine, Elbasynyń halyqtyń ál-aýqatyn kóterýge qatysty bastamalary birden qoldaý taýyp jatatyny qýantady. Sábıli bolǵan analar 25 myń teńge kóleminde bir mezettik kómek ala bastady. Buǵan qosymsha, olarǵa 10 aı boıyna ortasha eńbekaqy kórsetkishimen ótemaqy tólenip keledi. Sondaı-aq, kásiporyn músheleriniń áıelderi munda jumys istemese de, erlerge bir mezettik materıaldyq kómek jasalady. Bul urpaq ósirýdegi ákeniń abyroıyn kóteretini anyq.
“Kókshetaý mıneraldy sýlary” JShS iske asyryp jatqan áleýmettik sharalar 20 tarmaqtan turady. Jumysshylardyń turǵyn úı satyp alýyna byltyr paıyzsyz nesıeler bólingeni úlgi alarlyq járdem. Ujymda úzbeı jeti jyl jumys isteseńiz boldy, qosymsha ıgilikterdi paıdalanasyz. Munyń ózi, kóp jerdegideı, ardager uǵymyn shaý tartqan shaqta eske alý qasańdyǵyn joıady, tárbıelik mańyzy da bir tóbe.
Seriktestik qalanyń avtobýs qatynamaıtyn shalǵaı túkpirinde ornalasqan. Muny da kezinde jalyndy jastarǵa qoldaý kórsetpegen sheneýniktik kedergilerdiń saldary dep sanaǵan jón. Biraq, munda jumys qolyna zárýlik bolǵan emes. Konkýrspen iriktep alady. Qazir sheteldik qolaıly avtobýstarmen ketip bara jatqan júzi jaıdary jandarǵa bárimiz qyzyǵa qaraımyz. Tamaq ta tegin. Dastarhannan jyl boıy kókónis úzilmeıdi. О́zderiniń kókónis ósiretin jylyjaılary bar. Onyń ústine, jekelegen sehtardyń jumysshylaryna arnaıy taǵam beriledi. Buǵan jyl ishinde birneshe mıllıon teńge qarajat jumsalypty.
Ujym músheleriniń alańsyz eńbegi otbasyndaǵy jylyshyraıly moraldyq jaılylyqpen qatar, óndiristik serpin ákeletini belgili. Asqar Qazynabıuly bolashaqty bilimdi jastar jaınatatynyn jıi aıtady. Sondyqtan, áriptesteriniń balabaqshalar men mektepterdegi balalarynyń minez-qulqy, sabaq úlgerimine deıin habar alyp otyratyn dástúrge qyzyǵasyń. Bul endi aqshalaı kómekpen jalǵasyp kele jatqany túsinikti. О́tken jyly ǵana seriktestik Qazaqstan men Reseıdiń joǵary oqý oryndarynda dáris alatyn stýdentterge eki mıllıon teńge kóleminde qoldaý jasasa, syrttaı oqıtyndarǵa jarty mıllıon teńgelik kómek kórsetti. Buǵan qosyp aıtarymyz, tirshiliktiń kedir-budyr tustarynda jumysshylarǵa 5 mıllıon teńgeniń materıaldyq kómegi kórsetilse, ózderine bekitilgen zeınetkerlerge 7,2 mıllıon teńgeniń demeýshilik qarajaty jaratyldy. Árbir kásiporyn jyl ishinde osynshalyqty qaıyrymdy qushaǵyn asha berse qane, shirkin! Bul JShS ujymynyń árqaısysyna shaqqanda ortasha eńbekaqynyń aıyna 99 myń teńgeden aınalyp turǵandaǵy jaǵdaı.
Árıne, AQ qaıyrymdylyq qurylym emes, biraq, qajet jaǵdaıda demeýshilik qolyn sozý ómirlik qaǵıdat qundylyǵy. Qalalyqtardan joldanyp jatatyn alǵys hattar kóptigi de osydan. Jalpy, kóńildi shynaıy turǵydaǵy naryqtyq qurylymdar óz arbasyn ózi súıreıtin jaǵdaıǵa jetip qana qoımaı, memlekettiń tiregine aınalyp otyrǵandyǵy qýantady.
Áriptester lebizi
Anton MOR, «Novosibir Ekran zaýyty» AAQ-tyń kommersııalyq dırektory:
– Ekonomıkanyń damýymen qatar naryq talabyndaǵy básekelestik te óse túsetini barshaǵa málim. Bul oraıda kóp jyldardan bergi turaqty da senimdi áriptesimiz «Kókshetaý mıneraldy sýlary» (KMV) aksıonerlik qoǵamy únemi alda kele jatqany bizdiń de abyroıymyzdy kóterip otyrǵanyn aıtqym keledi.
Biz talǵamy bıik tutynýshylarǵa qyzmet etemiz. Taýardy usynýdaǵy mańyzdy talaptyń biri – ónimniń sórelerge qandaı ydysta, qandaı dızaın men formada ornalastyrylatynyna da baılanysty. «KMV» ónimderiniń assortımenttik qatarynda otyzdan astam taýar túri bar. Muny kóztartarlyq etip usynýdyń ózi úlken shyǵarmashylyq jumys desek, artyqtyǵy joq. Al, biz 10 jyldan beri kókshetaýlyq áriptesterimizge zaýytymyzda daıyndalǵan ártúrli qalyptaǵy shyny shólmekterdi kidirissiz jetkizip otyrmyz.
Men ujym atynan Qazaqstan Táýelsizdiginiń 20 jyldyǵy qarsańynda Kókshetaýǵa arnaıy shaqyrylyp, «Kókshetaý mıneraldy sýlarynyń» 20 jyldyq toıyna qatysqanymdy úlken qurmet ári jaýapkershilik sanaımyn. Berekeli baılanysymyz nyǵaıa bersin.
Alla Brodıanskıı, «ESAROM» (Avstrııa) kompanııasynyń Qazaqstandaǵy ókildiginiń dırektory:
– Kez kelgen eldi eren eńbegimen, ýaqytpen úndes izdenisterimen tanylǵan ujymdar ǵana álemge tanyta alady. Solardyń qatarynda ǵajaıyp tabıǵat qoınaýyndaǵy «Kókshetaý mıneraldy sýlary» AQ ta bar. Bizdi senimdi áriptesimizdiń Qazaqstan Táýelsizdiginiń bel balasy ekendigi, osynaý 20 jyldyq ulyq merekege telegeı tabystarmen kelip otyrǵandyǵy qýantady.
Men jańa «KMV – Sapa. Senimdilik. Jaýapkershilik.» atalatyn arnaıy fılmdi tamashaladym. 20 jyldyń árbir belesi qıyndyqtardy jeńý, jańalyqqa umtylý, eńbek zeınetin kórý qýanyshyna toly ekendigine qanyqtym. Qazir munda 60 túrli alkogolsiz sýsyndar daıyndalady, al aıyna 3 mıllıon dana ásem qutylar saýda sórelerine jóneltiledi. Bul orasan zor eńbek. Bizdiń fırmamyzdyń úlesi de tolymdy ekenin osydan-aq kórýge bolady.
Sergeı Voıtko, «RET Astana» kompanııasynyń bas dırektory:
– Álem nazaryndaǵy Astananyń rynogyna ený kez kelgen taýar óndirýshi úshin úlken mereı. Elimizdiń soltústik óńirindegi sýsyn óndirisiniń kóshbasshysy «Kókshetaý mıneraldy sýlary» AQ alǵashqy kúnnen bastap bas qala turǵyndarynyń qurmetine bólengen ujym bolyp tabylady. Mine, bizdiń de áriptestik baılanysymyz 12 jyl boıy úzdiksiz jalǵasyn taýyp otyr.
Aksıonerlik qoǵamnyń óndiristi damytyp, tehnologııalyq turǵydaǵy jańǵyrtýlarǵa eleýli ınvestısııa quıyp otyrǵandyǵy bul baılanystyń bekemdigin dáleldeıdi. Qazir Astananyń kez kelgen saýda núktelerinen Kókshetaýda shyǵarylǵan mıneraldy sýlar men shyryndardy kóptep kezdestirýge bolady. Biz buǵan nıettestik tilekpen qýanamyz.
Taǵy bir aıta ketetin jaǵdaı, kókshelikterdiń óz áriptesterine qurmetpen qaraıtyndyǵy. Qazaqstan táýelsizdiginiń qurdasy «Kókshetaý mıneraldy sýlary» AQ basshylyǵynyń meni arnaıy dıplom jáne eskertkish syılyqpen marapattaýy osyny dáleldeıdi.
Aıqarma betti daıyndaǵan – «Egemen Qazaqstannyń» Aqmola oblysy boıynsha menshikti tilshisi Baqbergen AMALBEK.