Semeı qalasyndaǵy Qazaq gýmanıtarlyq-zań ınnovasııalyq ýnıversıtetinde Qazaqstan Respýblıkasy Úkimeti qaýlysynyń negizinde Qazaqstan armııasyna zapastaǵy áskerı qyzmetshilerdi daıyndaıtyn áskerı kafedra ashyldy.
Áskerı kafedra jalpy aýmaǵy 1,3 gektardan astam jerdi alyp jatyr, munda úsh qabatty oqý korpýsy, áskerı tehnıka men qarý-jaraq saqtaıtyn boks, atý tıri, stýdentter ashanasy men sap túzeıtin alań ornalasqan. Qazirgi kezde aýdıtorııalardy zamanaýı oqý quraldarymen jabdyqtaý júzege asyrylýda.
Bir aıta keterligi, buǵan deıin joǵary oqý oryndarynda áskerı daıyndyq tek bir ǵana joǵary oqý ornynda medısınalyq áskerı-eseptegi mamandyqtar boıynsha júrgiziletin. Aldaǵy jyldyń qańtar aıynan bastap munda motoatqyshtar bólimshesi, sondaı-aq artıllerııa jáne baılanys mamandyqtary boıynsha oqytý iske asyrylmaq.
Atqarylyp jatqan sharalardyń barlyǵy Qazaqstan Qarýly Kúshteri men basqa da áskerler men áskerı quralymdarǵa ártúrli profıldegi rezerv daıyndaýǵa múmkindik jasaıdy.
Oksana PARPÝRA.