Almatyda elimizdiń tóraǵalyǵymen Ujymdyq qaýipsizdik týraly shart uıymyna múshe memleketterdiń Syrtqy ister mınıstrleri keńesiniń otyrysy ótti. Alqaly jıynǵa Qazaqstan, Reseı, Armenııa, Belarýs, Tájikstan, Qyrǵyzstan memleketteriniń Syrtqy ister mınıstrleri qatysyp, atalǵan alty memleket úshin mańyzdy sanalatyn ortaq máselelerdi talqylady.
Uıymǵa múshe elderdi alańdatqan zańsyz kóshi-qon, esirtki aınalymymen kúres, aqparattyq jáne kıberqylmystarǵa qarsy is-qımyl túrlerin birlese jetildirý syndy taqyryptar basqosýdyń negizgi ózegine aınaldy. Odan bólek uıym sheńberinde koalısııalyq jáne óńirlik negizdegi toptasýlardy, bitimgershilik kúshterdi, quqyq qorǵaý organdary men arnaıy qyzmetterdiń áskerı daıyndyǵyn damytý tetikteri de jan-jaqty talqylandy. Qatysýshylar tarapynan ózara yntymaqtastyqty arttyryp, jalpyǵa ortaq jumystardy kúsh biriktire otyryp eńserýdiń tıimdi jolyn tańdaý turǵysynda birqatar usynystar da aıtylmaı qalǵan joq. Jahan jurtshylyǵyn alańdatyp otyrǵan Sırııa, Aýǵanstan jaǵdaılaryna qatysty oı-pikirler ortaǵa tastalyp, ǵalamdyq turaqtylyq pen beıbitshilikti saqtaýda elimizdiń ustanyp otyrǵan saıasaty kóp memleketterge jarqyn úlgi ekeni sóz boldy.
«Qazaqstan qaı kezde de halyqaralyq qaýipsizdik pen turaqtylyqty qamtamasyz etýge zor mán beredi. О́ıtkeni bul tek Ortalyq Azııa óńiri úshin emes, dúnıejúzilik qoǵamdastyq úshin ózekti másele Memleket basshysy Nursultan Nazarbaevtyń bastamasymen Qazaqstan –álemdegi ıadrolyq qarýdan óz erkimen bas tartqan alǵashqy memleket. Búgin biz óńirlik qaýipsizdikti kúsheıtý, ujymdyq turaqtylyqty damytý boıynsha birneshe mańyzdy máseleni birlese talqylyp, ortaq sheshimderge keldik. Bul sheshimder memleketterdiń aýmaqtyq tutastyǵy men egemendigin qorǵaýǵa zor yqpal etedi dep esepteımin», dedi Qazaqstannyń Syrtqy ister mınıstri Qaırat Ábdirahmanov.
Qazaqstanda ekstremızm men terrorızmge qarsy kúres joǵary deńgeıde júrgizilip jatqanyn málimdegen Q.Ábdirahmanov, uıymǵa múshe memleketter arasyndaǵy senimdi seriktestik bul baǵyttaǵy ortaq problemalardy ońtaıly sheshýge oń yqpalyn tıgizetinin jetkizdi.
Arman OKTIаBR, «Egemen Qazaqstan»
ALMATY