Keshe Memleket basshysy Nursultan Nazarbaev Ujymdyq qaýipsizdik týraly shart uıymynyń Bas hatshysy Nıkolaı Bordıýjany qabyldady, dep habarlady Qazaqstan Respýblıkasy Prezıdentiniń baspasóz qyzmeti.
N.Bordıýja Prezıdentti UQShU-nyń aǵymdaǵy jyldyń jeltoqsan aıynda Máskeýde ótetin Ujymdyq qaýipsizdik Keńesiniń sessııasyna daıyndyq barysynan habardar etti.
– Tamyz aıynda Astanada UQShU-ǵa múshe elder Memleket basshylarynyń beıresmı sammıti ótti. Joǵary deńgeıde ótken kezdesý óte nátıjeli boldy. Prezıdentter Uıymdy damytýdyń salıqaly, túbegeıli máseleleri jóninde ýaǵdalasty. Búgin men Qazaqstan Prezıdentin Memleket basshylarynyń Astanada qol jetkizgen kelisimderdiń oryndalý barysynan habardar ettim. Máskeýdegi sessııada birqatar máseleler talqylanyp, UQShU-nyń damýyna aıtarlyqtaı serpin beretin qujattar qaralatyn bolady. Uıymǵa Tóraǵalyq etý Qazaqstan Respýblıkasyna ótedi. Ádette, Qazaqstannyń tóraǵalyǵy óte kreatıvti jáne tabysty bolady, sondyqtan biz kelesi jyl UQShU qyzmeti qarqyndylyǵymen jáne tıimdi nátıjelerimen erekshelenedi dep senemiz, – dep atap ótti N. Bordıýja.