Nazarbaev zııatkerlik mektepterinde 2012 jyly «Týǵan elge taǵzym» ólketaný ekspedısııasy bastalǵan edi. Bıyl bul joba birinshi ret Astana halyqaralyq mektebinde uıymdastyryldy. Elordanyń 20 jyldyǵyna arnalǵan ekspedısııaǵa 40 oqýshy qatysty.
Medısına jáne jol polısııasy qyzmetkerleriniń qadaǵalaýymen jolǵa shyqqan ekspedısııa músheleri eń aldymen erke Esildiń jaǵalaýyndaǵy elordanyń qonaqjaı oryndaryn tamashalady. Onyń ishinde «Otan qorǵaýshylar» monýmenti, «Han Shatyr» saýda-oıyn-saýyq kesheni, «Astana Opera» teatry, Beıbitshilik jáne kelisim saraıy, «Astana-Báıterek» jáne barlyq memlekettik organdar ornalasqan Bas alań ispetti shahardyń kórneki oryndary bar.
Al «Astana sý arnasy» kásiporny dırektorynyń orynbasary Talǵat Bekmaǵambetov oqýshylarǵa Sý ensıklopedııasy men túrli táttiler tartý etse, mekemeniń ınjener-tehnologi Tatıana Smolkova sorǵy-súzgi stansasy men sý qubyrlaryn basqarý ortalyǵynyń jumysyn kórsetti jáne Sý murajaıynyń dırektory Serik Ispanov jádigerlermen tanystyrdy.
Astanadaı alyp shahardy sýmen qamtamasyz etip otyrǵan aýqymdy kásiporynnyń jumysy oqýshylar úshin mazmundy maǵlumatqa toly boldy. Sondaı-aq mektep kerýeni «Sesna-astyq» korporasııasynyń makaron óńdeý zaýytynda boldy. «Sesna-Mak» JShS bas dırektorynyń keńesshisi Aleksandr Ostrıkov alqapta jaıqalǵan bıdaıdyń dastarqan basyna daıyn taǵam retine kelýine deıingi óńdeý prosesteri týraly áńgimeledi. 1969 jyly negizi qalanǵan kásiporyn qazirgi tańda Qazaqstan men shetel tutynýshylaryna keńinen tanymal, 15 enshiles jáne seriktestik kásiporyndardy biriktirip, eldegi eń iri 100 kásiporyn qataryna enip otyr.
Al Astana tórinen boı kótergen Etnoúıdiń tabaldyryǵynan attaǵan sátte quddy kóshpeli qazaq turmysyna sapar shekkendeı bolasyz. Úı ıeleri, zerger Berik Álimbaı men jary Gúlnar Aıatbek babalardan mura bolǵan áshekeıler, turmys quraldary, kórpe-kilemder men ulttyq aspaptardy otyz jyldan astam ýaqyt nasıhattap keledi. Zergerdiń qolynan shyqqan buıymdar Astanada ótken EQYU sammıti, EKSPO syndy aýqymdy kórmelerde kópshilik yqylasyna bólendi. Jas meımandarǵa Gúlnar Aıatbek jáne Alııa Ahmalısheva qazaq halqynyń kóne salt-dástúrlerin túsindirip, dastarqannan dám tattyrdy, án men kúı tartý etti.
Budan keıin Qaraǵandy qalasyndaǵy Nazarbaev zııatkerlik mektebine aıaldap, oqý ornynyń jetekshisi Ravıl Iаkýpovpen jolyqqan oqýshylar odan soń áıgili GÝLAG quramynda bolǵan Qaraǵandy eńbekpen túzeý lagerine bardy. HH ǵasyrdaǵy myńdaǵan jazyqsyz adamdardyń qany men kóz jasyna sýarylǵan saıası qýǵyn-súrgin – tarıhymyzdyń sherli betteriniń biri. Ásirese týǵan tarıhqa taǵzym etken óskeleń urpaq úshin Dolınka aýylynda ornalasqan «KarLag» esten ketpes áser qaldyrdy. Jandaryn shúberekke túıip, bastaryn oqqa baılaǵan arystardyń sol kezdegi jaǵdaıyn jan-júregimen sezindi. Bul sapardyń saıası qýǵyn-súrgin qurbandaryn eske alý kúnimen qatar kelýi de oqýshylardyń oı-tanymyna oqshaý áser syılaǵandaı.
Ekspedısııa sońynda jer shoqtyǵy atanǵan kórikti Kókshetaýdyń eń ásem, janǵa shıpaly Býrabaı óńirine barýy balalardy shabyttandyra tústi. Shortandy kólin qorshaǵan Oqjetpes, Jumbaqtas, Jekebatyr, Bólektaýdyń ańyzdaryna qanyqqan balalar Bólektaý shyńyna shyǵyp, Býrabaıdyń tamasha tabıǵatyn, qaraǵaıly ormanyn, bir-birinen móldir kólderi arqyly bólinip jatqan jartasty shyńdardy tamashalady.
Bes kúnge jalǵasqan mádenı-tarıhı jáne ınnovasııalyq nysandarda bolǵan ekspedısııa oqýshylardyń týǵan ólkeniń tarıhyn bilýge, ata-babadan qalǵan mırasty baǵalaı bilýge, áleýmettik jobalardy zerdeleýge jeteleıtini anyq.
Danagúl DARISOVA