Ortalyq kommýnıkasııalar qyzmetinde Aqparat jáne kommýnıkasııalar mınıstri Dáýren Abaevtyń qatysýymen baspasóz máslıhaty ótti. Kezdesý barysynda mınıstr vedomstvonyń bir jyl kóleminde atqarǵan jumystary men aldaǵy josparlary týraly baıandady.
«Osy jyldyń 16 mamyrynda Aqparat jáne kommýnıkasııalar mınıstrliginiń halyq aldyndaǵy esep berý jıyny ótti. О́tken jyly da dál osyndaı formattaǵy kezdesý ótkizgen bolatynbyz. Meniń oıymsha, mundaı sharalar memlekettik organdar men halyq arasyndaǵy baılanysty nyǵaıtýǵa jaqsy múmkindik beredi. Eseptik kezdesý selektorlyq tártip boıynsha ótkizildi. Iаǵnı elimizdiń barlyq aımaǵymen baılanys ornattyq. Kezdesýge jalpy esep boıynsha 1000-ǵa jýyq adam qatysty.
Bul is-sharaǵa qatysýshylardyń arasynda ortalyq memlekettik organdardyń, mınıstrlikke qarasty qoǵamdyq keńes pen BAQ-tyń, baılanys operatorlarynyń, IT-kompanııalar men úkimettik emes uıymdardyń ókilderi boldy. Eseptik kezdesý «Habar24» telearnasy men bnews.kz aqparattyq agenttigi saıty arqyly onlaın rejimde translıasııalandy. BAQ arqyly jan-jaqty taratyldy. Sonymen qatar mınıstrdiń blogi men call-ortalyq arqyly suraqtardy qabyldaý uıymdastyryldy. Osylaısha jalpy sany 33 suraq kelip tústi. Zaldan 11 adam suraq qoıdy. 22 suraq elimizdiń ózge oblystarynan joldandy. Bul suraqtardyń basym bóligi memlekettik qyzmet kórsetý sapasyna baılanysty boldy. Sondaı-aq uıaly baılanys operatorlarynyń jumysyna, BAQ týraly zańǵa qatysty jáne «Sıfrly Qazaqstan» memlekettik baǵdarlamasynyń júzege asýyna baılanysty suraqtar qoıyldy», dedi mınıstr.
Sonymen qatar ol ótken jyly qabyldanǵan «Sıfrly Qazaqstan» memlekettik baǵdarlamasynyń baǵyttarynyń biri – eldegi Internet-ınfraqurylymyn damytý bolyp tabylatynyn tilge tıek etti.
«Qazirgi ýaqytta elimizdegi 13 mıllıonnan astam adam joǵary jyldamdyqtaǵy ınternetke qol jetkizdi. Halyq sany 10 myń adamnan turatyn eldi mekender 3G baılanysymen, 50 myńnan astam turǵyny bar mekender 4G standartymen qamtylǵan. О́tken jyly elimizdiń barlyq aýdan ortalyqtary tórtinshi býyndaǵy ınternet jelisimen qamtyldy. Mınıstrliktiń budan keıingi mindeti keń jolaqty ınternetti aýyldyq eldi mekenderge jetkizý bolyp tabylady, ol úshin memlekettik-jekemenshik áriptestik jobasyna sáıkes tıisti jumys júzege asyrylýda. Joba aıasynda 2021 jylǵa deıin joǵary jyldamdyqtaǵy ınternetpen jalpy sany 2 mıllıonnan astam turǵyny bar 1249 aýyldyq eldi meken qamtylatyn bolady», dedi mınıstr.
Budan bólek Aqparat jáne kommýnıkasııalar mınıstri D.Abaev uıaly telefondardyń paıdalanýshylary óz qurylǵylaryn 2018 jyldyń sońyna deıin tirkeýi qajet ekenin eskertip ótti.
«Uıaly telefondardy tirkeý úshin uıaly baılanys operatorlarynyń abonenttik bólimshelerine barýdyń qajeti joq. Abonentter onlaın nemese SMS arqyly tirkele alady. Aıta ketetin taǵy bir jaıt, «Sıfrly Qazaqstan» memlekettik baǵdarlamasyn iske asyrý aıasynda «Elektrondy úkimet jáne elektrondy memlekettik qyzmetter» kýrsy boıynsha oqytý ádistemesi men jospary jasaldy, onyń kómegimen halyqtyń sıfrly saýattylyǵyn arttyrý josparlanýda. 2018 jyldyń maýsymynan tamyz aıyna deıin «UAT» AQ, «Qazposhta» AQ, «Zerde» AQ jáne jergilikti atqarýshy organdarmen birlese otyryp, shamamen jarty mıllıon adamdy sıfrly saýattylyqqa úıretý kózdelgen. Oqytý kelesi baǵyttar boıynsha júrgiziledi. Birinshi, «Negizgi sıfrly daǵdylar» boıynsha. Ekinshi, «Elektrondy úkimet jáne elektrondy memlekettik qyzmetter» boıynsha. Úshinshi, «Ashyq úkimet» baǵytynda. Sońǵysy – «Elektrondy kommersııa» boıynsha. Buǵan ınternette ónimder men qyzmetterdi satyp alý, satý jáne taratý daǵdylaryn qamtıtyn elektrondy kommersııa kýrstary jatady. Jalpy, 8 mıllıon adamnyń sıfrly saýattylyǵyn arttyrý josparlanyp otyr», dedi Dáýren Abaev.
Raýan QAIDAR,
«Egemen Qazaqstan»