Ulttyq biryńǵaı testileý (UBT) 2016 jylǵa deıin oqýshylardyń bilim sapasyn syrttan attestattaý formasy bolyp keldi, ol mektepti bitirý emtıhandary men joǵary oqý oryndaryna túsý emtıhandaryn biriktiretin.
2017 jyldan Bilim jáne ǵylym mınıstrligi UBT-ny eki kezeńge bólý týraly sheshim qabyldady. Bul format boıynsha orta bilim týraly attestat alý úshin túlekter mektepte emtıhan tapsyryp, al JOO-ǵa túsý úshin UBT tapsyrýǵa tıisti boldy. Sóıtip JOO-ǵa túsýde oqýshylardyń bilim sapasyn jańasha baǵalaý qolǵa alyndy. Alaıda, JOO-ǵa túsý týraly ótinish tapsyrý, qajetti qujattardy jınaý, olardy UBT pýnktterine ótkizý, sondaı-aq abıtýrıenttiń emtıhanǵa qatysýyn qamtamasyz etý mektepke júktelgen.
Osynyń ózi eshqandaı quqyqtyq normalarmen rettelmeıtin tártip, óıtkeni mektep qolyna attestat tapsyrǵannan keıin túlekpen qosh aıtysyp, ózderiniń qatarynan shyǵarady emes pe? Túlektiń endigi isi JOO-men bolsa, buǵan mekteptiń qandaı qatysy bar?
Mine, bıyl da 15 maýsymda mektep bitirýshiler attestasııa qorytyndysymen attestattaryn qoldaryna alady. Osy sátten bastap olar mektep oqýshysy emes, endi abıtýrıent retinde JOO-larmen quqyqtyq qatynasqa túsedi. Demek muǵalimderdiń moınynan olardy JOO-larǵa aparý, qujattaryn daıyndatý sııaqty mindetter alynýy kerek edi. Alaıda Bilim jáne ǵylym mınıstri Erlan Saǵadıev muǵalimderge artyq mindet júktemeıtinin talaı ret aıtsa da óziniń buıryqtarymen olardyń moınyna tıisti emes fýnksııalardy ilýden jalyqpaýda.
Osyǵan baılanysty biz Premer-Mınıstr Baqytjan Saǵyntaevtyń atyna depýtattyq saýal joldap, Bilim jáne ǵylym mınıstrligi tarapynan oryn alyp otyrǵan osy keleńsizdikti joıýyn ótinýge májbúr bolyp otyrmyz. Atap aıtqanda, biz E.Saǵadıevtiń buıryǵymen bekitilgen UBT jáne keshendi testileý týraly Erejedegi №1 paragrafty («UBT-ǵa qatysý qujattaryn bilim berý uıymdary arqyly qabyldaý tártibi») aldyryp tastaýǵa tikeleı ózińizdiń aralasýyńyzdy suraımyz. Bul saýaldy qoldap 20 shaqty depýtat qolyn qoıdy. Áriptesterimizdiń bári de jumystary onsyz da kóp muǵalimderge artyq mindet júkteýdiń durys emestigin qoldap otyr.
Natalıa JUMADILDAEVA,
Májilis depýtaty