Andreevka – bolashaǵy jarqyn aýyldardyń biri. Tútini túzý shalqyǵan eldi mekende ornalasqan «Arqalyq» sharýa qojalyǵy astyq ósirýmen qatar bıe ustap, qymyz ashytady. Ozyq tehnologııamen óndiriletin janǵa shıpa dárýmen ónim óńirden tysqary jerlerge de jóneltiledi. Al Seráli Sharıpov jetekshilik etetin «Andreevka SK» JShS eginshilikpen de, mal sharýashylyǵymen de shuǵyldanady.
Taǵy bir sharýashylyqtyń ıesi Aleksandr Tkalıa jeke qarajatyna eki zaly bar meıramhana salyp berdi. Bir sózben aıtqanda, halyqtyń eseli eńbek etýine de, qalypty tynyǵýyna da barlyq jaǵdaı jasalǵan. Jýyrda osynda «Rýhanı jańǵyrý» baǵdarlamasy sheńberinde jańa meshit paıdalanýǵa berilip, saltanatty jaǵdaıda ashyldy.
Igilikti sharada sóılegen sózinde oblys ákiminiń birinshi orynbasary Aıdarbek Saparov táýelsizdik kezeńinde «Mádenı mura», «Halyq – tarıh tolqynynda» baǵdarlamalary boıynsha tarıhı-mádenı eskertkishter men nysandardy jańǵyrtýda, tól tarıhymyzǵa qatysty qujattardy júıeli jınaqtaýda ulan-ǵaıyr ister tyndyrylǵanyn, al «Bolashaqqa baǵdar: rýhanı jańǵyrý» baǵdarlamalyq maqalasynda Elbasy búgingideı dúbirli dúnıede sana-sezimimiz ben dúnıetanymymyzǵa ábden sińip qalǵan taptaýryn qaǵıdalardan arylý, ol úshin zamana aǵymyna ıkemdelý, jańa dáýirdiń jaqsy sıpattaryn boıymyzǵa sińirý, jańa turpatty jańǵyrýdyń eń basty kilti – ulttyq kodty saqtaı bilý sekildi keshendi mindetter júktegenin atap ótti. Ortaq qýanyshqa jınalǵan jurtshylyqty aýyl ómirindegi aıtýly oqıǵamen quttyqtady.
Sonaý alystan izgi nıetin bólisýge kelgen «Qyzyljar» meshitiniń bas ımamy Kenjetaı qajy Baıkemeluly oraza aıynyń ekinshi kúninde Jaratqannyń qoldaýymen iske qosylǵan ǵıbadathana musylman jamaǵaty úshin qutty ornyna aınalatynyna senim bildirdi. Meshittiń moldasy Zulqaınar Ergashevtiń qolyna Qazaqstan Musylmandary dinı basqarmasynyń tóraǵasy, Bas múftı Serikbaı qajy Orazdyń qoly qoıylyp, móri basylǵan tirkeý qujatyn ustatty. Arnaıy dinı ázirlikten ótken oǵan sharýashylyqtar esebinen baspana berilip, jalaqy taǵaıyndalatyn boldy.
Bıik munaraly, aı múıizdi meshit pen jaıly ashana aýylǵa erekshe kórik beredi. Aınalasy abattandyrylyp, aǵash kóshetteri egilgen. Onyń salynýyna qarjylyq járdem jasaǵan Bilálovter áýleti ár salada qyzmet atqarǵanmen, osyndaı ıgilikti sharalarǵa kópten beri muryndyq bolyp júr. Jańa meshitke esimi berilgen Sultanǵazy Bilálov eline eleýli, halqyna qalaýly azamat bolǵan, 20 jylǵa jýyq ómirin keńshardyń bas esepshisi retinde ótkergen. Ol osynda eńbek etken jyldary saýda kesheni, eki qabatty eńseli mektep, klýb, 200-deı turǵyn úı, kóptegen óndiristik nysandar salynǵan. Bıyl 125 jyldyq mereıtoıy atap ótiletin Maǵjan Jumabaevqa atalas, týys bolyp keletin marqum aqıyq aqyn aqtalysymen týǵan aýyly – Sartomar eldi mekeniniń turǵyndaryn jınap, as bergen. Onyń ákesi Bilál de «halyq jaýy» retinde atý jazasyna kesilgen. Kishipeıil minezimen, jomart kóńilimen, qolynyń ashyqtyǵymen jurtshylyq iltıpatyna bólengen. Adamǵa degen erekshe qurmet baılyqpen baǵalanbaıtynyn, qyzmetpen ólshenbeıtinin kózi tirisinde dáleldep ketken.
Eńbek ardageri Jasulan Qazbekovtiń sózi de jınalǵandarǵa erekshe áser etti. Qazir gazet-kitaptarda jıi basylyp júrgen Maǵjannyń jalǵyz sýretin Sultekeń saqtap qalǵan. Aqyn aqtalmaǵan kezdiń ózinde úıiniń tórinde fotosy ilýli turatyn. 4 ul men 1 qyz ósirip, azamat qataryna jetkizgen marqumnyń qudaı qosqan qosaǵy Álımá ájeı tolqı sóılep, qýanyshtan kózine jas aldy. Oblystyń qurmetti azamattary Bolat Saǵyndyqov, Qudaıbergen Qalıev, taǵy basqalary áýletti jaqsy biletinderin, Sultekeńniń úlken uly Serik bes jarym jyl boıy oblys ákimi qyzmetin abyroıly atqarǵanyn, Parlament Senatynyń depýtaty bolǵanyn, Erigi qus fabrıkasyn, qyzy Záını mektep basqaratynyn, ata-ana úmiti aqtaldy degen osyndaı bolatynyn jetkizdi.
Jańa ashanada as berilip, arýaqtarǵa quran baǵyshtaldy.
О́mir ESQALI, «Egemen Qazaqstan»
Soltústik Qazaqstan oblysy,
Mamlıýt aýdany