Elorda toıynda erekshe dýmanǵa bólengen jerlerdiń biri qala syrtyndaǵy «Qazanat» atshabary boldy. Astananyń 20 jyldyq mereıtoıyna 20 mıllıon teńge júlde taǵaıyndaǵan aıtýly báıgeni kórýge asyqqan jylqy jandy kórermen báıge bastalmaı-aq atshabardy lyq toltyryp tastapty.
Sonymen dúbirli báıgeniń aldynda 29 maýsymda bastalyp, aqtyq saıysyn 6 shildege oraılastyrǵan kókpardyń fınaldyq jekpe-jegi uıymdastyryldy. Báseke 15 komandadan fınaldyq kezdesýge joldama alǵan Jambyl oblysynyń «Áýlıe ata», Túrkistan oblysynyń «Qulager», Mańǵystaýdyń «Adaı ata» jáne Qyzylorda oblysynyń «Seıhýn» komandalary arasynda ótti. Nátıjesinde, «Seıhýndy» jeńgen Mańǵystaý kókparshylary III orynǵa taban tirese, neshe jyldan beri chempıondyqty bermeı kele jatqan Jambyl oblysy II oryndy qanaǵat tutty. Sóıtip jaqynda ǵana mártebesi ósken Túrkistan oblysynyń komandasy jeńimpaz atanyp, mereıi ústep, meımanasy tasydy.
Qazaq úshin qashanda báıgeniń orny erekshe ekenin taǵatsyzdana kútken kórermen taǵy da bir dáleldedi. Báıge 16 shaqyrymdyq kishi alaman, 25 shaqyrymdyq úlken alaman bolyp bólindi. Uıymdastyrýshylar alań ólshemin eskerip, ár óńirden ekeýden ǵana at qatystyrǵan bul báıgege oblystaǵy tańdaýly, aldyna qara salmaǵan júırikter kelgen. Sonymen alǵashqy 16 shaqyrymdyq alamanǵa qatysqan 24 attan márege 8 at keldi. Onyń beseýine júlde berildi.
Almaty oblysynyń Talǵar qalasynan kelgen úsh jasar «Murager» esimdi kók qunan qara nópir qalyń eldi shýlatyp birinshi keldi. Júıriktiń ıesi – Merhat Bulǵynov, bapkeri – Aıdyn Útbaev. Al shabandozy áıgili jel taqym Aqjol Jumataı. Birinshi orynǵa 3 300 000 teńge kólemindegi júlde berildi.
Ekinshi bolyp Qaraǵandy oblysynyń «Laıt Endjl» atty aǵylshyn tuqymdy kúreń dóneni keldi. At ıesi – Dýlat Baeshov, al báıgege jaratqan bapkeri – Sharızat Qaztaev, shabandozy – Rahmen Álisher. Olar 1 850 000 teńge kólemindegi júldemen marapattaldy.
Arnur Kýrvanjan taqymdaǵan Astana qalasynyń «Almaty» esimdi úsh jasar aǵylshyn tuqymdy jıreni márege úshinshi bolyp jetti. Báıgege jaratqan bapkeri – Maqsat Tókenov bolsa, ıesi – Qýanysh Ákimjanov. Úshinshi júldeger 1 200 000 teńge kólemindegi syılyqpen marapattaldy.
Damır Súleımenov mingen Shyǵys Qazaqstan oblysynyń Taskesken aýylynan kelgen «Sozıdan» esimdi jıren qasqa tizgindi tórtinshi bolyp ustatty. At ıesi – Erasyl Súleımenov bolsa, bapkeri – Beken Abaqanov. Olarǵa 550 000 teńge tabystaldy.
Besinshi oryn Batys Qazaqstan oblysynyń Jańaqala aýdanynan kelgen Serik Bekqaıyrovtyń «Roza» esimdi úsh jasar júırigine buıyrdy. Atty jaratqan bapker – Maqsat Bekqaıyrov, shabandozy – Bekzat Sádýaqas. Júlde – 400 000 teńge.
Endigi qyzyq 25 shaqyrymdyq báıgede. Eldiń de delebesi ábden qozǵan. Aldynan shaýyp ótken júırikterdiń qaısysy birinshi keletinin boljam jasap, bástesip jatqandary da az emes. Kimniń qandaı atty belgilep otyrǵany da kópshilikke habarlanyp, taqym qysqan jurttyń qarasy onan saıyn molaıa berdi. Sóıtip úlken alamannyń júldeli júırikteri de anyqtaldy.
Saǵymdaı júıtkip, juldyzdaı aqqan Bekzat Sádýaqastyń taqymyndaǵy Batys Qazaqstan oblysynyń Jańaqala aýdanynan kelgen Serik Bekqaıyrovtyń «Qarakóz» esimdi úsh jasar aǵylshyn tuqymdy torysy basqalarynan ozyq keldi. Atty jaratqan bapker Maqsat Bekqaıyrov 6 600 000 teńge kólemindegi júldeni qanjyǵalady.
Ekinshi bolyp «Qarakózge» shylbyrtastam ǵana jetpeı Aqjol Jumataı mingen «Buırajal» atty Qaraǵandy oblysynyń aǵylshyn tuqymdy jıren qasqa bestisi keldi. At ıesi – Nurlybek Muhamedııarov, al báıgege jaratqan bapkeri – Baqtııar Quralbaev. Olar 3 300 000 teńge kólemindegi júldeni ıelendi.
Orazaly Jorabek tizgindegen Almaty qalasynyń «Vernyı» esimdi aǵylshyn tuqymdy kúreń bestisi úshinshi bolyp jetti. Báıgege jaratqan bapkeri – Aıdyn Útbaev. Úshinshi orynǵa 1 650 000 teńge kólemindegi syıaqy berildi.Tórtinshi bolyp Hakımbek Qojaqov mingen Jambyl oblysynan kelgen «Suńqartory» esimdi aǵylshyn tuqymdy tory qunan keldi. At ıesi – Dıas Myrzahan bolsa, bapkeri – Baqytbek Sybanbaev. Bul orynǵa 650 000 teńge kólemindegi júlde taǵaıyndalypty.
Arnur Kýrvanjannyń taqymynda oınaǵan «Baqtory» esimdi sáıgúlik bestikti túıindedi. Astana qalasy atynan qatysqan aǵylshyn tuqymdy tory besti. Júıriktiń ıesi – Qýanysh Ákimjanov, al bapkeri – Maqsat Tókenov. Besinshi oryn júldesi – 500 000 teńge.
Sonymen segiz kún boıy elordadaǵy «Qazanat» atshabaryn dúbirge bólegen Qazaqstannyń chempıonaty osylaısha aıaqtaldy. Chempıonattyń jabylý saltanatyna Astana qalasy ákiminiń orynbasary Ermek Amanshaev, Mádenıet jáne sport mınıstrliginiń jaýapty hatshysy Qýatjan Ýálıev, Ulttyq sport qaýymdastyǵynyń prezıdenti Bekbolat Tileýhan, Qazaqstan Jazýshylar odaǵynyń tóraǵasy Ulyqbek Esdáýlet qatysyp, jeńimpazdardy marapattady.
Astananyń 20 jyldyǵyna oraı Qazaqstan Respýblıkasy Ulttyq sport qaýymdastyǵy, Mádenıet jáne sport mınıstrligi men Astana qalasy ákimdiginiń qoldaýymen ótken bul báıgeniń úlken alamanynda birinshi kelgen has júırik «Qarakóz» alaman báıgege tuńǵysh ret tigilgen «Astana kýbogyn» enshilep qaıtty.
Ularbek NURǴALYMULY,
«Egemen Qazaqstan»