Qostanaıda ótken Prezıdent kóp saıysy boıynsha Ishki ister mınıstrligi uıymdastyrǵan respýblıkalyq chempıonatta qostanaılyq polıseıler birinshi oryndy qanjyǵalady. Chempıonatqa elimiz aımaqtaryndaǵy ishki ister departamentteriniń 120 ókili qatysty. Árıne, olardyń arasynda alań ıesi «Dınamo» deneshynyqtyrý-sport uıymy da bar.
Jarysta júzýden, 1000/3000 metrge júgirýden, jamby atýdan, alysqa granata laqytýdan, uzyndyqqa sekirýden elimizdegi polıseı-sportshylar saıysqa tústi. Jarys qorytyndysy boıynsha Qostanaı oblystyq ishki ister departamentiniń qurama komandasy jalpy komandalyq birinshi oryndy aldy. Ekinshi oryn Soltústik Qazaqstan sportshylaryna, úshinshi oryn qaraǵandylyqtarǵa buıyrdy.
«Qostanaı oblystyq ishki ister departamentinde qyzmetkerlerdiń sportpen shuǵyldanýyna, sport túrlerin damytýǵa kóp kóńil bólinedi. Bul jolǵy chempıonat qostanaılyq polıseılerdiń sporttyq joǵary daıyndyǵyn jáne jeńiske degen erik-jigerin kórsetti», - dedi «Dınamo» deneshynyqtyrý-sport uıymy» qoǵamdyq birlestiginiń ortalyq keńesi basqarmasynyń basshysy Nıkolaı Knıazev.
Názıra Járimbet
«Egemen Qazaqstan»
Qostanaı