Qazaqtyń kórnekti jazýshysy, Qazaqstan Respýblıkasy Memlekettik syılyǵynyń ıegeri Ákim Tarazı bıyl 85 jasqa tolady. Qazaq oqyrmanyna óziniń «Úlken aýyl», «Qyz mahabbaty», «Qııansoqpaq», «Tasjarǵan» jáne ózge de shyǵarmalarymen tanymal qalamger týǵan topyraǵyna kelip, halyqpen júzdesti. Áýlıeatalyqtar jerles qalamgerdi ıgi nıetpen qarsy alyp, laıyqty qurmet kórsetti.
Taraz qalasyndaǵy Jambyl atyndaǵy «Rýhanııat» ortalyǵynda oblystyq ishki saıasat basqarmasynyń uıymdastyrýymen jazýshy Ákim Tarazımen kezdesý ótti. Kezdesýge Parlament Senatynyń depýtaty Abdaly Nuralıevpen qatar Áýlıeata óńirinde turatyn Nesipbek Dáýtaıuly, Qaıyrbek Asanov, Shyryn Mamaserikova jáne basqa da aqyn-jazýshylar qatysty. Atalǵan ádebı sharany oblystyq ishki saıasat basqarmasynyń basshysy Berik Ýálı júrgizip otyrdy.
Erkin formatta ótken kezdesý barysynda Ákim Tarazı óziniń ómir jáne shyǵarmashylyq jolynan áńgime órbitti. Sonymen qatar, qalamger kópshilikke týǵan jer týraly tolǵanysyn, ádebıet týraly oılaryn jetkizdi. Keńestik kezeńde Májıt Begalınniń rejısserligimen túsirilgen «Tulpardyń izi» kınofılminiń taǵdyry týraly da áńgimeledi. Sondaı-aq jazýshy óz ómirinde erekshe mańyzǵa ıe kezeńderge toqtalyp, Lenıngrad ýnıversıtetiniń kitaphanasynan qasıetti Quran kitabyn suraǵany úshin qýǵynǵa túskenin de aıtty. Sol arqyly keńestik kezeńniń qıyn bolǵanyn, sonda da bolashaq urpaqtyń ıgiligi úshin shyǵarmalar jazǵanyn áńgimeledi. Alpysynshy jyldary ádebıetke qatar kelgen Qalıhan Ysqaq, Saıyn Muratbekov, Ramazan Toqtarov sııaqty qalamdastary týraly estelikter aıtyp, olardy saǵynyshpen eske aldy. Bul rette jazýshy «Men dostarymdy ózim tańdadym» dep aǵynan jaryldy. «Týǵan jerge kelip, halyqpen júzdesýdiń ózi myń ordenge tatıdy. Týǵan topyraǵym men úshin árdaıym ystyq ári qasterli» dedi jazýshy óz sózinde. Áńgime barysynda jazýshynyń jary, belgili qalamger Roza Muqanova Ákim Tarazıdiń ómiri men shyǵarmashylyǵyndaǵy juldyzdy sátterge toqtaldy.
Sonymen Áýlıeata óńirinde Ákim Tarazıdiń 85 jyldyǵyna arnalǵan sharalar bastalyp ketti. Qazaq sóz ónerinde aıtýly bıikke kóterilgen qalamgerge degen qurmet eshqashan tolastamaıdy.
Hamıt ESAMAN, «Egemen Qazaqstan»