Kómir baǵasynyń qymbattaýyn deldaldar qoldan jasap otyr. Bul týraly keshe Úkimette ótken baspasóz máslıhatynda «QTJ» UK» AQ atqarýshy dırektory - «Júk tasymaly» AQ basqarma tóraǵasynyń mindetin atqarýshy Qaırat Saýyrbaev málimdedi.
Onyń aıtýynsha, jylý berý maýsymy qarsańynda kómir naryǵynda baǵanyń deńgeıin jasandy túrde ósirý baıqalady. Birinshi kezekte bul jaǵdaı kómir óndirýshiler men tutynýshylar arasynda birqatar deldal uıymdardyń baǵany shekten tys asyrýyna baılanysty. Eskeretini, kómir baǵasyn bekitý, saýdalyq qyzmetti retteý jáne deldaldyq qurylymdardy joıý Energetıka mınıstrliginiń quzyryna jatpaıdy. Bul máseleni retteý Ulttyq ekonomıka mınıstrliginiń quzyrynda. Atalǵan mınıstrlik bıylǵy jylý maýsymynda kóterilgen máseleni sheshý úshin naqty qadamdar jasap otyrǵan joq. Tek Úkimettiń tapsyrmasy boıynsha bırjalyq saýda mehanızmin jetildirý, kómir naryǵyna qatysýshylarǵa talaptardy ornatý jáne kómir saýdasy naryǵynyń ashyqtyǵyn qamtamasyz etý boıynsha tıisti Zań jobasyn ázirleý qarastyrǵan. Biraq onyń naqty qashan júzege asatyny áli belgisiz.
Q.Saýyrbaev keltirgen málimetke súıensek, bıylǵy 7 aıda kompanııa 56 mln tonna kómirdi tasyp úlgergen. Bul kórsetkish ótken jylǵy sáıkes kezeńmen salystyrǵanda artyq bolyp otyr. Kommýnaldyq-turmystyq qajettilikter boıynsha tutynýshylar úshin 4,5 mln tonna kómir jetkizilip, bul kórsetkish byltyrǵa qaraǵanda 10 paıyzǵa joǵary. Sondaı-aq, jyl sońyna deıin 106,5 mln tonna kómir tasymaldaý josparlanyp otyr. Onyń ishinde qazaqstandyq tutynýshylarǵa 75,9 mln tonna jetkizilmek. Júk tasymaldaıtyn kompanııada atalǵan júkke arnalǵan 54 myń ashyq vagon bar, sonyń 29 myńy kómir tasymalyna jumyldyrylǵan. Sáıkesinshe, bul kórsetkish byltyrmen salystyrǵanda 4 myń vagonǵa artyq.
− Kommýnaldyq-turmystyq kómirdi tasymaldaýǵa 9 myńnan astam ashyq vagon tartyldy. Jyljymaly quramnyń tapshylyǵyn boldyrmaý maqsatynda ashyq vagondardy kómir razrezderine bekitý sharalary iske asyryldy, -dedi Q.Saýyrbaev.
Aıta keterligi, byltyr jylytý maýsymy kezinde elde kómir tapshylyǵy týyndap, atalǵan otyn túrine suraqtyń joǵary bolýynan baǵa sharyqtap ketken bolatyn. Atalǵan sala mamandary jergilikti atqarý organdarynyń aldyn ala qamdanbaǵany jáne kómir jetkizýshilerdiń josparly túrde jumys jasamaǵany saldarynan kómir tapshylyǵy sezilgenin aıtady. Bul másele bıyl qaıtadan qaıtalanbas úshin Energetıka mınıstrligi
jergilikti atqarýshy organdarǵa 2018-2019 jyldarǵa arnalǵan kommýnaldy-turmystyq qajettilikterge jáne turǵyndardyń kómirge suranysy boıynsha jospar quryldy tapsyryp otyr.
Erkejan AITQAZY,
«Egemen Qazaqstan»