Aqmola oblysynyń «El birligi» qoǵamdyq birlestigi oblystyq ishki saıasat basqarmasynyń áleýmettik tapsyrysy aıasynda Qazaqstan Respýblıkasynyń Konstıtýsııasy kúni qarsańynda Kókshetaý – Zerendi – Býrabaı – Kókshetaý baǵytynda avtosherý ótkizdi.
Bul sherýdiń basty maqsaty – Memlekettik rámizderdi jan-jaqty nasıhattaý jáne Ata Zańymyzda aıtylǵan qundylyqtardy kópshilikke keńinen túsindirý. Kók Týymen tuǵyrly, Eltańbasymen eńseli, Ánuranymen aıbatty, Qazaq eliniń máńgiliktiń dańǵylyna túsken kerýen kóshiniń ón boıynda jańa zamannyń jyly lebi esedi. Shuǵylaly kúnniń astynda qalyqtap ushqan qyran da qazaqtyń alar bıigi asqaq ekeninen syr shertetindeı.
Al kıeli shańyraq bolyp beınelengen Eltańba da shanshylǵan ýyqtarmen birtutas órnek quryp, altyn pyraqtarmen kómkerilip, «Meniń, Qazaqstanym!» degen uran sózdermen áýezdi ánge ulasyp, júrekterdi terbeıdi.
Avtosherý zerli Zerendiniń sulý tabıǵaty aıasynan ótip, aýdan ortalyǵyndaǵy alańǵa kelip toqtady. Bir-birimen tizbektelgen kólikter Kók Týymyzben bezendirilip, azattyqtyń ár kúni óziniń áserli taǵylymymen qymbat ekeninen habar bergendeı. Sherýge qatysýshylar alańǵa jınalǵan qaýymmen tildesip, suhbattasty. Ata Zań merekesiniń aıasynda uıymdastyrylǵan sharanyń máni men mańyzy túsindirildi.
Abylaı hannyń aq ordasy qonǵan kıeli Býrabaı aýdanynyń ortalyǵy – Shýche qalasynda onǵa tarta Kók Týmen bezendirilgen avtosherý birneshe kósheni aralap ótip, ortalyq alańǵa kelip toqtady. Bul jerde júzden astam adam qatysqan mıtıng ótti. Jergilikti ónerpazdardyń án shashýymen bastaý alǵan sharada Býrabaı aýdany ákiminiń orynbasary Málıke Nurpanova sóz sóılep, barsha qaýymdy aldaǵy Konstıtýsııa kúnimen quttyqtady. «El birligi» qoǵamdyq birlestiginiń tóraǵasy Baqyt Smaǵul patrıottyq ráýishte sózin jalǵap, keshegi ǵun men saq babalarymyzdan jalǵasqan tarıh jolyna sholý jasady. Al atalǵan birlestik tóraǵasynyń orynbasary Esbolat Dúısenbaev sharaǵa jınalǵan jalyndy jastardy bir jelpindirip, eldiktiń asqaq uǵymyn tebirene jetkizdi.
Baıqal BAIÁDIL,
«Egemen Qazaqstan»
Aqmola oblysy