1 qyrkúıek - Bilim kúninde elimizde 3 mıllıonnan astam oqýshy bilim ordalaryna barsa, sonyń 350 myńy alǵash ret mektep tabaldyryǵyn attap otyr. Shyǵys Qazaqstanda 657 mektep esikterin aıqara ashyp, 183 myń oqýshy alǵashqy qońyraýǵa qatyssa, onyń 21 myńy - 1 synyp oqýshylary. Al oblys ortalyǵy – О́skemen qalasynda bıyl 35 myńnan astam oqýshy partaǵa otyrsa, sonyń 2500-i 1 synyp oqýshylary atandy.
О́skemen qalasynyń ákimi Jaqsylyq Omar búgin shahardaǵy birneshe bilim ordasyn aralap, ustazdar qaýymy men oqýshylardy merekemen quttyqtady. Sonyń biri - Oralhan Bókeı atyndaǵy №44 mektep-lıseı. Bilim ordasynyń dırektory Tańatqan Túmenbaevtyń aıtýynsha, búginde oqý oshaǵynda 900-den astam oqýshy bilim alady. «Byltyr mektebimizdi 871 oqýshy aıaqtady. Sonyń 73 paıyzy, ıaǵnı 641-i mektepti úzdik bitirdi. 15 oqýshy «Altyn belgi» ıegeri atandy. Bıyl 100 oqýshy 1 synypqa qabyldandy. Olardyń qadamdaryna aq jol, ustazdardyń eńbegine jemis tileımiz», - deıdi mektep dırektory.
О́skemenniń ákimi J.Omar shahardaǵy №8, 15 mektepten keıin joǵaryda atalǵan №44 mektep-lıseıde bolyp, ustazdar men ata-analardy Bilim kúnimen quttyqtap, joǵary synyp oqýshylarymen pikir almasty. «О́zim 1997 jyly mektep bitirdim. Ol kezde eldiń jaǵdaıy nashar edi. Tańerteń mektepke erte kep otyn jaǵatynbyz. Qyzdar eden jýýǵa kómektesetin. Jaqsy muǵalim, jaqsy sport zaly, jaqsy ashana túgili jaryqtyń ózine zar bolatynbyz. Mektepte eshqandaı mádenı shara ótpeıtin. Synyp sýyq, qalyń kıimmen otyratynbyz. Jaz boıy kanıkýlǵa barmaı, mektepti jóndeý jumystaryna qatysatynbyz. Men ótkenge ókpe aıtyp otyrǵan joqpyn. Sizder sony salystyryp qarasa degen oımen aıtyp otyrmyn. Qıyndyq ta adamdy shyńdaıdy ǵoı. Qıynshylyq boldy. Múmkin qarnymyz ash bolǵan shyǵar. Kıimimiz jyrtyq bolǵan shyǵar. Bilim alýǵa tolyq múmkindigimiz bolmaǵan shyǵar. Biraq onyń da ózindik jaqsylyǵy boldy dep oılaımyn. Búgin mine Elbasymyzdyń salıqaly saıasatynyń, memleket qamqorlyǵynyń arqasynda sizderge bilim alýǵa barlyq jaǵdaı jasalǵan. Úkimet mektepterge mıllıondaǵan qarjy jumsasa, muǵalimder sizderdi oqytý úshin mıllıardttaǵan nerv talshyqtaryn jumsaıdy. Sol ustazdaryńyzdyń eńbegin aqtańyzdar», - dedi qala ákimi.
Reti kelgende aıta keteıik, sońǵy 3 jylda oblystyń 17 myń muǵalimi kýrstyq daıarlyqtan ótipti. Bıyl óńir mektepteriniń oqýshylaryna 1,5 mıllıon dana jańa oqýlyqtar satyp alynypty.
Erekshe atap óterligi, jańa oqý jylynda «Rýhanı jańǵyrý» baǵdarlamasynyń aıasyndaǵy «Meniń mektebim» baǵdarlamasy arqyly Shyǵys Qazaqstandaǵy 277 tolyq komplektili mektepte fızıka, hımııa, bıologııa jáne robot tehnıka kabınetteri men IT-synyptar ashyldy.
Azamat QASYM,
«Egemen Qazaqstan»
О́SKEMEN