Jambyl oblysynyń Shý aýdanyndaǵy ekologııalyq taza maqsary maıyn shyǵaratyn «Kaz-Ir AGRO» JShS alǵash ret 37 tonnadan astam ónimin Japonııaǵa jóneltti.
Atalǵan kásiporynǵa «Kazakh Export» eksporttyq saqtandyrý kompanııasy» AQ qaryzdy saqtandyrý jolymen qoldaý kórsetip, eki júz mıllıon teńgeni kepildendirip otyr. Sonyń nátıjesinde zaýyt ónimderin eksportqa shyǵarýǵa múmkindik týdy.
«Kaz-Ir Agro» jaýapkershiligi shekteýli seriktestigi osy jyldyń maýsym aıynda Kúnshyǵys eline maqsary maıyn eksporttaý týraly kelisimshartqa otyrǵan. Japonııa eliniń mamandary Qazaqstanǵa arnaıy kelip, óndiristiń sapasyn jiti qadaǵalap, tekserýden ótkizipti. «Kaz-Ir Agro» JShS bas dırektory Hamıdreza Alınagııannyń aıtýynsha, zaýyt búginde táýligine 3 tonna maqsary maıyn óndirýge qabiletti, qyrkúıekte qýatyn eki esege arttyrý josparlanǵan. Germanııadan ákelingen qondyrǵylarmen jabdyqtalǵan nysanda 60 adam jumys isteıdi. Zaýyt salqyndatylǵan syǵý tehnologııasyn qoldanýymen erekshelenedi. Bul maqsary maıynyń quramyndaǵy dárýmender men paıdaly elementterdiń joıylmaýy úshin taptyrmas ádis. Sondyqtan shet elderden keletin suranys jyldan jylǵa artyp otyr.
Kompanııa búgingi tańda Nıderlandqa maqsary maıyn jetkizý úshin bir jyldyq kelisimshartty jasaý jóninde kelissózder júrgizýde. Sonymen qatar maqsary maıy Qytaı, Chehııa, Japonııa, Reseı jáne О́zbekstan elderine eksporttalýda.
Erkejan AITQAZY,
«Egemen Qazaqstan»