Kemege qansha jolaýshy minetini, qaı baǵytpen júretini, qandaı qalalarǵa toqtaıtyny – bári-bári ózge tilde aıtyldy.
Sol kezde Ol:
«Bizdiń tilimiz uly muhıtqa shyǵý úshin saıası aılaqtyń ruqsatyn kútip, qańtarylyp turǵan keme tárizdi eken-aý», dep oılady.
* * *
Ushaq jerge qonǵan kezde jolaýshylar dý qol shapalaqtap qýanyp jatty.
«Ne úshin?.. – degen oı keldi oǵan. – Árıne, ómir úshin, tirshilik úshin».
О́ıtkeni jolaýshylar osydan bir apta buryn kórshi elde apatqa ushyraǵan ushaqtyń taǵdyrynan jaqsy habardar edi.
* * *
– Oı, sen kim bop ketkensiń?! – dedi oǵan otyz jyldan beri kórispegen bir tanysy tańdana qarap. – Kim bop ketkensiń?..
«Iаpyr-aı, sen meni osydan on bes jyl buryn kórgenińde ǵoı! «Oý, ne bop ketkensiń?! Ne bop?..» deıtin ediń-aý!..» dep oılady Ol.
* * *
1998 jyly Shymqalaǵa kelgen bir iri sheneýnik:
– Sizder syrttan kelgen qonaqtarǵa quraq ushyp, jik-jappar bolýdy qoımaıdy ekensizder! – dep qabaq shytyp edi.
Kim bilsin, ol kisiniki de jón shyǵar. Biraq dál sol kúngi sózi orynsyzdaý kóringeni ras. Sebebi Shymqalaǵa álem ádebıetiniń klassıgi Shyńǵys Aıtmatov qonaq bolyp kelip jatqan-dy...
Sodan beri de talaı jyl ótti arada. Uly jazýshy da, álgi sheneýnik te máńgilik saparǵa attandy.
«Árbir jańa urpaqqa jazýshynyń shyǵarmalary jyl saıyn qonaq bolyp keledi, – dep oılady Ol. – Al siz, sheneýnik myrza, bul qalaǵa endi kele almaısyz...».
* * *
«Adam balasy óziniń jan dúnıesine jiti úńilse, jer betindegi sekildi onda da bıik taýlar, ózen-kólder, teńizder men muhıttar bar ekenin baǵamdar edi. Sonymen birge túpsiz tereń shatqaldar, ushy-qıyry joq shóleıt dalalar men apat aımaqtary da kóp ekenin kórip, záresi ushar edi... – dep oılady Ol. – Sondyqtan da, oǵan zer salýǵa qorqyp, ámanda jeńil joldy tańdaýǵa qumbylmyz.
Biraq bul, shyn máninde, ózińdi óziń tanymaı, ózgelerge qul bolyp ótý emes pe?..».
Nurǵalı ORAZ,
«Egemen Qazaqstan»