Atyraýlyq oqýshylar demalys kúnderin Saraıshyq aýylynda ótkizedi. Bul bastamany oblystyq kásipkerlik jáne ındýstrııalyq-ınnovasııalyq damý basqarmasy Elbasynyń «Rýhanı jańǵyrý» baǵdarlamasy aıasynda qolǵa alyp otyr.
Jibek joly boıynda ornalasqan kóne shahardyń ornynan tabylǵan qundy jádigerler arnaıy mýzeıde saqtalǵan. Oqýshylar tarıhı orynmen tanysyp qana qoımaı, tarıhyna qanyǵady, sheberlik sabaqtaryna qatysady. Osy demalys kúnderi balalar qysh qumyra men sazsyrnaı jasaýdy úırendi.
Qolóner sheberi Jaılaý Talasov: «Qazir turmystyq buıymdardyń basym bóligi hımııalyq qospalar arqyly jasalady. Onyń zııany aıtpasa da túsinikti, sondyqtan ulttyq qolónerdi qaıta jańǵyrtýymyz kerek. Burynǵy kıiz ben tekemetti tárk etip, sıntetıkalyq ónim paıdalanǵandy jón kóremiz. Ata-babamyz tazalyqqa erekshe mán bergen. Mysaly, kıiz úıde teris energııa jınalatyn burysh bolmaǵandyqtan, sheńber boıymen syrt aınalyp ketedi. Jańa zaman talabyna saı bolǵan jaqsy shyǵar, biraq ótkenimizdi de umytpaǵan abzal», – deıdi.
Oblystyq kásipkerlik jáne ındýstrııalyq-ınnovasııalyq damý basqarmasy týrızmdi damytý bólimniń bas mamany Almas Kópjanov týrıstik baǵyttaǵy taǵylymdy sharalar jyl boıyna jalǵasatynyn aıtady. Mektep oqýshylaryna demalys kúnderi arnaıy saıahat uıymdastyrylyp, ulttyq oıyndardan jarys, taqyryptyq dárister men sheberlik sabaqtaryn ótkizip turý dástúrge aınalady.
Baqytgúl BABASh,
«Egemen Qazaqstan»
ATYRAÝ