Dzıýdodan Bakýde shymyldyǵy ashylǵan álem chempıonatynyń alǵashqy jarys kúni eki salmaq dárejesiniń júldeleri sarapqa salyndy. Qazaqstannyń týy astynda óner kórsetken Otgonseseg Galbadrah qola medaldi ıelense, Gusman Qyrǵyzbaev qalyń toptyń arasynda qalyp qoıdy.
48 kılo salmaq dárejesindegi saıystyń alǵashqy aınalymdarynda Otgonseseg Galbadrah brazılııalyq Gabrıela Shıbana men ıspanııalyq Laýra Abelende Martınesti esh qınalmaı utqanymen, oıda-joqta ýkraınalyq Darııa Belodedke jol berdi. Jubanysh básekesinde slovenııalyq Marýsıa Stangarǵa san soqtyrǵan jerlesimiz sheshýshi tusta óziniń syralǵy qarsylasy, álem chempıony, álem chempıonatynyń eki dúrkin kúmis júldegeri, Azııa oıyndarynyń jeńimpazy, Azııanyń eki dúrkin chempıony, mońǵolııalyq Uranseseg Muńbatty jeńip, qola medaldi moınyna ildi.
Áıelder arasyndaǵy asa jeńil salmaqta tosyn nátıje tirkeldi. Fınalda byltyrǵy jylǵy álem chempıony, 23 jastaǵy Japonııanyń juldyzy Fýna Tanakı men 17 jastaǵy ýkraınalyq Darııa Beloded beldesti. Bul básekede kópshilik dańqty balýannyń jeńiske jetetinine qylaýdaı da kúmán keltirgen joq. Desek te Darııa asqan daryn ıesi eken. Dańqty qarsylasynan esh qaımyqpaǵan boıjetken kezdesýdiń basynan aıaǵyna deıin óte saýatty kúresip, aqyry álem chempıony atandy.
Erler básekesinde Ǵusman Qyrǵyzbaevqa erekshe senim arttyq. 60 kılo salmaqtaǵy kóshbasshymyz Eldos Smetovtiń Jakartada ótken Azııa oıyndarynda jaraqat alǵannan keıin ulttyq qurama bapkerleri joǵaryda esimi atalǵan dzıýdoshyny dúbirli dodaǵa úkilep qosty. Bastapqy básekelerde týnıstik Sahın Ahmet Qaba men monakolyq Iаn Sıkkardıge san soqtyrǵan Qyrǵyzbaev úshinshi beldesýinde Brazılııanyń beldi balýany Erık Takabatakqa ese jiberip, jetinshi orynda qalyp qoıdy.
Bul salmaqta bas júlde úshin talas japonııalyq Naohıso Takato men reseılik Robert Mshvıdobadze arasynda ótip, bul aıqas alǵashqysynyń paıdasynan sheshildi. Al álem chempıonatynyń qola medali Japonııanyń taǵy bir ókili Rýıýjý Nagaıama men grýzııalyq Amıran Papınashvılıge buıyrdy.
Ǵalym SÚLEIMEN,
«Egemen Qazaqstan»