Parlament Senaty Tóraǵasynyń orynbasary Bektas Beknazarov jáne Parlament Májilisiniń depýtaty Magerram Magerramov quramyna engen Qazaqstan Respýblıkasy Parlamentiniń resmı delegasııasy Ázerbaıjan Parlamentiniń 100-jyldyǵyna arnalǵan saltanatty sharaǵa qatysty, dep habarlaıdy Parlament Senatynyń baspasóz qyzmeti.
B.Beknazarov osy mereıtoımen ázerbaıjan tarapyn quttyqtaı kelip, kúrdeli jyldarda negizi qalanǵan táýelsizdik, demokratııa jáne parlamentarızm ıdeıalary qazirgi Ázerbaıjanda odan ári damý ústinde ekenin atap ótti. Eki el arasynda qalyptasqan baýyrlas jáne dostyq baılanystarǵa erekshe toqtalǵan ol Ázerbaıjan Qazaqstan úshin Ońtústik Kavkaz óńirindegi negizgi áriptes bolyp tabylatynyn jetkizdi.
Senat Tóraǵasynyń orynbasary sonymen qatar ekijaqty parlamentaralyq baılanystar men yntymaqtastyq kóptarapty qurylymdar aıasynda odan ári nyǵaıyp, keńeıe túsetinine senimin bildirdi. Qazaqstan delegasııasynyń basshysy sóz sońynda baýyrlas ázerbaıjan halqyna beıbitshilik pen órkendeı berýine tilektestigin bildirdi.
Saltanatty sharaǵa 150 memlekettiń parlamenttik delegasııalary, Bakýda tirkelgen dıplomatııalyq mıssııalar men halyqaralyq uıymdarynyń basshylary jáne basqa da resmı adamdar qatysty.