Aqtaýda trıatlonnan «TEMIRADAM» Qazaqstan Kýbogynyń fınaly bastaldy. Keshe kásibı sportshylardan myqtylar anyqtalyp, Qazaqstan quramasyna úzdikter irikteldi.
Aqtaý qalasynyń 55 jyldyǵy qarsańynda uıymdastyrylyp otyrǵan jarysta alǵashqy kúni 20 kásibı trıatlonshy qatysty. Saıysqa Astana, Almaty, Shymkent pen Qostanaı qalalarynan kelgen kásibı sportshylar básekege tústi.
- Biz Almaty qalasynan keldik. Quramamyzben jaz boıy daıyndaldyq. Byltyrǵy Qazaqstan kýbogynda áıelder arasyndaǵy trıatlonnnan alǵashqy úsh oryndy aldy. Jigitterimiz de osal emes. Únemi úzdikterden kórinip júredi. Ázirshe balalar toby kelmedi. Aqtaýda ótken jarysta Almaty úzdik bolatyna senemin. Qazir halyq bul sport túrine qyzyǵyp keledi, - deıdi Almaty quramasynyń bas jattyqtyrýshysy Maksım Mazýr.
Sportshylar 1500 metr Kaspııde júzip, 40 shaqyrymdy velosıpedpen júrip ótti. Odan soń 10 shaqyrym júgirdi. Jarys qortyndysy boıynsha jasóspirimder arasyndaǵy birinshi topta 2001 jyly týǵan Danıl Zýbsov (Shymkent) márege birinshi keldi. Al, 2-shi oryndy Erasyl Amanjolov (Shymkent) ıelendi. Erasyldyń aıtýynsha, Aqtaýdyń aýa-raıy trıatlon sportyn damytýǵa óte qolaıly. «Sý óte tereń emes boldy. Basynda tizege deıin júgirip óttik. Velosıped tepkende de jel qatty bolmady. Men ózim trıatlonnan ulttyq qurama múshesimin», - deıdi jeńimpaz.
Al, elıta dep atalatyn eresekter arasynda 1-shi oryndy márege 2 saǵatta kelgen Sabyrjan Qosaq (Shymkent) ıelendi. 12 jyl sport salasynda júrgen ol osyǵan deıin jeńil atletıkadan Qazaqstan chempoıony atanǵan. 3 jyl buryn trıatlonǵa aýysypty. «Qazaqstandaǵy sońǵy jarysym osy Qazaqstan kýbogy. Úzdik atanǵanyma qýanyshtymyn. О́te qıyn boldy. Biraq, nátıjesi jaman emes. Bıylǵa 2-shi márte márege birinshi bolyp keldim. Jattyqtyrýshylaryma rahmet aıtamyn. Buıyrsa Gonkongqa jarysqa ketemin. Daıyndyq jaman emes. Endi Qazaqstannyń atynan qatysamyz. Aqtaýdyń 55 jyldyǵy qutty bolsyn!», - deıdi Sabyrjan. Al, ekinshi orynda Daryn Qonysbaev (Almaty).
Erteńgi saıys kúni Astana, Almaty, Qyrǵyz Respýblıkasy, sonymen qatar Aqtóbe, Mańǵystaý, Aqmola, Qaraǵandy, Qostanaı jáne Pavlodar oblystarynyń sportshylary baq synaıdy. Sondaı-aq,ı «TEMIR ARU» , «TEMIR BALA» saıystar uıymdastyrylmaq. Arýlar 3 km qashyqtyqqa júgirse, balalar 400 m-den 1500 m-ge deıingi qashyqtyqtarda júgiredi.