Búgin Astana Media Week aıasynda óńirlik BAQ forýmyn QR Aqparat jáne kommýnıkasııalar mınıstri Dáýren Abaev ashty.
Dáýren Abaev aımaqtyq medıanyń mańyzdylyǵyn alǵa tartyp:
«Bıyl úshinshi jyl óńirlik mass-medıa ókilderiniń basyn qosyp otyrǵan forým Astana Media Week aıasynda ótip jatqany barshańyzǵa belgili. Jýrnalıster úshin, baspasóz qyzmeti men aqparat salasynyń basqa da mamandary úshin kóptegen semınar-trenıngter ótti. Memlekettik múddeni halyqqa jetkizip, qoǵamdaǵy ózgeristerge saı kózqaras qalyptastyrýda aımaqtyq medıanyń mańyzy zor. Osy oraıda qazirgi kúni óńirlik aqparat quraldarynyń aldynda úlken maqsat-mindetter tur. Ol - Memleket basshysynyń tapsyrmasymen júzege asyrylyp jatqan saıası, ekonomıkalyq jáne rýhanı jańǵyrý jónindegi keshendi reformalarǵa jurtshylyqty jumyldyrý», dedi.
Sonymen qatar aımaqtyq forýmnyń maqsat-mindetin basa aıtyp, Aqparat jáne kommýnıkasııalar mınıstrliginiń qandaı sharalar júrgizip jatyrǵany jaıly bólisti:
«Atap aıtqanda, Aqparat jáne kommýnıkasııalar mınıstrligi qazirgi efırlyq-sıfrlyq aqparat, teleradıohabarlardy taratýdy uıymdastyrý jumystaryn júrgizip jatyr. Aımaqtyq forýmnyń kózdegen taǵy bir maqsaty - el turǵyndarynyń medıa saýattylyǵyn arttyrý, medıa mádenıetin qalyptastyrý. Jalpy, aımaqtyq jýrnalıster tarapynan osyndaı máseleler kóterilip, onyń belgili bir deńgeıde sheshimin tabýy forýmnyń paıdaly tusyn ańǵartady. Aldaǵy ýaqytta aımaqtyq forým ózara pikir men tájirıbe almasýdyń turaqty alańyna aınalady dep senemin. Aqparat jáne kommýnıkasııalar mınıstrligi óńirlik mass-medıanyń sapasyn arttyratyn kez kelgen bastamany qoldaýǵa ázir», dedi mınıstr.