8-14 qazan aralyǵynda Techstars akselerator qamqorlyǵymen Astanada jáne Almatyda startapshylardyń alǵashqy halyqaralyq aptalyǵy ótedi, dep habarlaıdy Astana qalasy ákimdiginiń resmı saıty.
Joba bastamashylary: MOST bıznes-ınkýbator, «Tehnologııalyq damý jónindegi ulttyq agenttik» AQ, Astana ákimdigi, «Astana Innovations» AQ jáne t. b. Bir apta ishinde elimizdiń eki iri qalasynda 30-dan astam shara ótedi. Árbir baǵyt boıynsha oqytý, netvorkıng, konkýrstar jáne basqa da is-sharalar júrgiziletin bolady.
Astana qalasynda úsh hakaton josparlanǵan, onda jas startapshylardyń saýda jáne túrli konferensııalar taqyrybyna arnalǵan jumystary qaralady. Is-shara barasynda Qazaqstannyń barlyq startap-ekojúıesiniń qatysýshylaryn bir ortaǵa jınap, túrli kezdesýler, dárister, pikirtalastar ótkizý josparlanǵan.
Startup Week Qazaqstan mynadaı baǵyttardan turady: FinTech, Smart City, Ekojúıeler, Entrepreneurship, aqparattyq tehnologııalar (IT), qyz-kelinshekter kásipkerligi, korporatıvtik ınnovasııalar.
Aıta keteıik, 2017 jyly 80-nen astam el osy tárizdes «Techstars Startup Week» aptalyǵyn ótkizdi. Onda bir apta boıy jetekshi sarapshylar óz tájirıbelerimen bólisti jáne oqytý kýrstaryn júrgizdi. Techstars Startup Week-tiń basty maqsaty jas kásipkerlerdi biriktirý, jergilikti kásipkerlik qoǵamdastyǵyn damytý jáne kóshbasshylar men daryndy adamdar úshin jańa múmkindikter qarastyrý.