1 qazan – Halyqaralyq qarttar kúni. Qazaqstanda da jyl saıyn bul kún qarttarymyzdyń ǵumyr boıy istegen eńbekterine ári memleketimizdiń qalyptasýyna qosqan zor úlesterine saı syı-qurmet kórsetiledi. Bıyl da mereıli mereke óz deńgeıinde atalyp ótilmek. Dástúrli jıyndardan bólek elimizdegi Ardagerler uıymy 1 qazan – Halyqaralyq qarttar kúnine oraı «Qarttarym – asyl qazynam» atty qaıyrymdylyq aksııasyna shaqyratyn úndeý jarııalap otyr.
Qashanda úlkendi syılaý, qarııany qurmetteý dástúri – qazaq halqynyń ata salty ekeni belgili. Elimizde qart adamdarǵa degen yqylas jyl saıyn artyp, memleket tarapynan olarǵa kórsetiletin kómektiń kólemi de ulǵaıyp keledi.
«Árbir azamattyń qartaıǵan kezindegi ómirin laıyqty etý – memleketimizdiń áleýmettik saıasatynyń basty baǵyttarynyń biri. Osynyń aıqyn dáleli retinde Memleket basshysy Nursultan Nazarbaevtyń jyl saıynǵy halyqqa dástúrli Joldaýynda kóterilgen mindetterdiń biri zeınetaqy mólsheri jyldan-jylǵa artyp keledi. Ekinshi dúnıejúzilik soǵys ardagerlerine beriletin arnaıy memlekettik járdemaqynyń mólsheri de ulǵaıdy. Qarttar úshin memleket tarapynan kórsetilip otyrǵan ıgilikti ister áli de jalǵasa bermek», deıdi Ortalyq keńes tóraǵasynyń orynbasary Bekbolat Muqyshev.
Deı turǵanmen, jastyq shaǵyn elimizdiń gúldenýi men órkendep damýyna arnap, mańdaı terin tókken atalar men ájelerge qurmet kórsetý tek memleket tarapynan ǵana emes – búgingi jas býynnyń basty paryzy ekenin de umytpaǵan jón.
Úndeýdiń ishinde osy baǵytta, ıaǵnı kómekke muqtaj qarttarymyzdy jastar bolyp qamqorlyqqa alý jaıly aıtylady. Halqymyzda «Jumyla kótergen júk jeńil» degen jaqsy maqal bar. Barshańyzdy 1 qazan – Halyqaralyq qarttar kúnine oraı, óz óńirlerińizdegi ardagerler uıymdarymen baılanys jasap, halqymyzǵa tán adamgershilikpen qamqorlyqqa zárý adamdarǵa kómek kórsetýge shaqyramyz. Jumyla qımyldap, eldigimizdi kórseteıik, ardagerlerimizdi ardaqtaıyq» delingen Úndeýde.
Bıyl naýryz aıynyń basynda Elbasymyz ulttyń áleýmettik jańǵyrý jolynda jańa, aýqymdy qadam jasaýǵa shaqyryp, bes áleýmettik bastamadan turatyn Úndeýin jarııalaǵany belgili. Olardyń qatarynda baspana alýdyń jańa múmkindikteri, jalaqysy tómen jumysshylardyń salyq júktemesin azaıtý, joǵary bilim alýdyń qoljetimdiligi men sapasyn arttyrý, shaǵyn nesıe berýdi kóbeıtý, eldi gazben qamtamasyz etý máseleleri bar. Qazirgi ýaqytta Úkimette Prezıdenttiń bes áleýmettik bastamasyn iske asyrý jóninde Jol kartasy qabyldanǵan. Muny aıtyp otyrǵan sebebimiz, negizgi jumystardyń barlyǵy «Memlekettiń bolashaǵy – jastar, el erteńine keleshek kepil» degen baǵytta júrgizilip keledi. Alaıda osy qoǵamnyń irgetasyn nyǵaıtý úshin búgingi jas býynǵa úzdik úlgili, ónegeli tárbıe, eljandylyqqa baýlý sııaqty moraldyq normalardyń bastaýynda qazynaly qarttarymyzdyń turǵanyn árqashan este ustaýymyz qajet. Sonymen qatar elimizdiń jas azamatyn otansúıgishtikke tárbıeleý men belsendi ómir ustanymyn qalyptastyrýda da ardager ata-apalarymyzdyń ómiri men eńbek joldary úlgi.
Joǵaryda Úndeýde aıtylǵandaı, qaıyrymdylyq aksııasyna óz úlesimizdi qosyp, qarttarǵa qolqanat bolýdy árqaısymyz ózimizge borysh sanaýymyz kerek.
Mıras ASAN,
«Egemen Qazaqstan»