Qazan aıynyń 9 juldyzynda Astanada Halyqaralyq Túrki akademııasynyń (TWESCO) atsalysýymen Tokıo ýnıversıteti qoǵamdyq ǵylymdar ortalyǵynyń professory Hısao Komasýdyń leksııasy ótti. Sondaı-aq Halyqaralyq Túrki akademııasy men Japonııanyń «Toıo býnko» zertteý ortalyǵy arasynda ózara yntymaqtastyq týraly memorandýmǵa qol qoıyldy, dep habarlaıdy Halyqaralyq Túrki akademııasynyń baspasóz qyzmeti.
Atalǵan leksııany TWESCO men Japonııa qory birlese uıymdastyrdy. Túrik tilinde ótken leksııaǵa ǵalymdar, halyqaralyq uıymdardyń ókilderi, jýrnalıster qatysty. Professor Hısao Komasýdyń «Jańa tarıhı derekter negizinde Abdýlrashıd Ibrahımniń qyzmeti jáne Japonııamen qarym-qatynas» dep atalatyn leksııasy HH ǵasyrdyń basyndaǵy tatar qaıratkerleri biriniń ómirine arnaldy. Hısao Komasý qaıratkerdiń Japonııaǵa sapary, japondyq musylmandarmen baılanysyn zerttegen. Atalǵan shara TWESCO-da japon ǵalymdarynyń qatysýymen ótip jatqan ǵylymı leksııalardyń jalǵasy bolyp sanalady. Esterińizge salar bolsaq, qazan aıynyń 3 kúni Akademııada japon zertteýshileriniń qatysýmen leksııa ótken bolatyn.
Al, Túrki akademııasy men «Toıo býnko» zertteý ortalyǵy arasynda qol qoıylǵan yntymaqtastyq týraly memorandýmynda túrkologııa salasynda birlese jumys isteý, ǵylymı týyndylardy almasý, ǵalymdardyń ózara tájirıbe bólisýi tárizdi birqatar máseleler qamtyldy.