Búgin Astanada balalardyń óz-ózine degen senimdiligi men jeke tulǵalyq qasıetterin damytýǵa baǵyttalǵan halyqaralyq «Kazakhstan Kids Fashion Show-2018» shoý - kórsetilimi ótti.
Bıyl «О́z armanyńdy qos!» taqyrybymen kórermenge usynylǵan balalar shoý – kórsetilimin tamashalaýǵa álemniń 16 elinen sán áleminiń ozyq mamandary men belgili feshn-saıttar men jýrnaldardyń negizin qalaýshylar, sán aptalyǵyn uıymdastyrýshylary jáne dızaınerler arnaıy keldi. Qurmetti qonaqtardyń qatarynda AQSh, Kanada jáne Eýropa aýmaǵynda taralyp, 150 mıllıon sán saıttarynyń ishinde ondyqqa kiretin FNL Network televızııalyq onlaın-jýrnalynyń negizin qalaýshy jáne prodıýseri Rocco Leo Gaglioti, «Gazetta Italia» feshn-jýrnalynyń redaktory Sebastiano Giorgi jáne Mad Mood Milan Fashion Week prezıdenti Marianna Miceli bar.
Qazaqtyń shapanyn jamylyp kelgen FNL Network televızııalyq onlaın-jýrnalynyń negizin qalaýshy Rocco Leo Gaglioti qazaqstandyq dızaınerlerdiń jas bola tura, asa talantty ekenine tańdasynyń bildirdi: «Birinshiden ulttyq kıimderińizdiń óte ádemi ekenin aıta keteıin. Maǵan ústimdegi shapandy osy elge kelgenimde qazaqstandyq "baýyrym" Aıdarhan syılady. Men onyń kreatıvtiligine tánti boldym. Ol óz jumystary arqyly maǵan Qazaqstannyń sán álemin tanystyrdy. Osyndaı taǵy birneshe talantty qazaqstandyq dızaınerlerdi bilemin. Sondyqtan men úshin «Kazakhstan Kids Fashion Show-2018» shoý - kórsetilimine qatysý mańyzdy boldy.»
Qazaqstannyń túrli aımaǵynan kelgen dızaınerler qatarynda Aıdarhan Qalıev, Zarına Akshýlakova, Maııa Jýmanbekova, Sabına Janzakova jáne Veronıka Ivanchenko boldy. Al sheteldik dızaınerlerden Christophe Guillarme (Parıj, Fransııa), Indra Kaffemanaite (Mılan, Italııa), Ekaterına Ivankovanyń(Florensııa, Italııa) toptamalary kórsetildi.
Shoý-kórsetilimde 14 jasar qazaqstandyq dızaıner Veronıka Ivanchenko alǵash ret óz toptamasyn usyndy:
«Bul meniń dızaıner retindegi alǵashqy jumysym. Negizi sán áleminde 10 jasymnan beri model retinde tanyldym. Maǵan dızaıner bolýǵa shabyt bergen «Barbı» mýltfılmderindegi «Sán» úıleri edi. Sol kezden ózimniń úlken sán úıimniń bolǵanyn qaladym. Búgin «Ronı» atty alǵashqy kolleksııamdy tanystyrdym. Ereksheligi, munda kóshe stılindegi, erkin, jastarǵa yńǵaıly, zamanaýı toptamalar ǵana boldy.»
Jas talant Veronıka bolashaǵyn da sán álemimen baılanystyrýdy josparlaıdy jáne álemniń túkpir-túkipirinen balalar qatysa alatyn «Kazakhstan Kids Fashion Show-2018» sekildi úlken shoýlardy uıymdastyramyn deıdi.
Bıyl kórsetilimge 60-tan astam model qatysty, olar 6 kastıngten ótip, iriktelgen. Qatysýshylar qatarynda elimizge tanymal telejúrgizýshiler Dana Nurjigittiń, Araı Álimhannyń jáne Juldyz Abdýkarımovanyń uly bar.
Jas ana, telejúrgizýshi Araı Álimhannyń aıtýynsha:
«Mundaı aýqymdy jobalar balalardyń tulǵalyq qabiletin arttyrýda zor mańyzǵa ıe. Sebebi kishkentaı kezinen belsendi bolǵan balalar eshqashan ynjyq, uıalshaq bolmaıdy. Kerisinshe, olar únemi kóshbasshy bolýǵa, jan-jaqty bolýǵa tyrysady. Qazir Anýar 5 jasta, sondyqtan ne úshin, qandaı jobaǵa qatysyp jatqanyn jaqsy biledi. Joba aıasyndaǵy fotokórmede ulym ıspandyq, álemdik chempıon Rafael Nadaldyń rólinde boldy. Bir mysal, osydan keıin Anýardyń tennıske degen qyzyǵýshylyǵy artyp, «men de chempıon bolamyn» deı bastady. Mundaı jobalardy men bir jaǵynan, tárbıelik prosess dep esepteımin.»
Al televızııada óziniń «dara joly» bar Dana Nurjigit:
«Álimniń bıdi jaqsy kóretinin, sahnadan qoryqpaıtynyn osy jobadan keıin ańǵardym. Fotokórmede brıtandyq súıikti ánshim Djordj Maıkldyń obrazynda boldy. Bolashaqta da ulym óner salasynda bolady dep oılaımyn» - dese,
Dana hanymnyń uly, Álim bolashaqta eline qyzmet etkisi keletin nıetin bildirdi: «men bolashaqta Prezıdenttiń kómekshisi bolsam deımin»
Aıta ketetin jaǵdaı, álemniń tanymal tulǵalarynyń keıpine engen qatysýshylar fotokórmesi Eýropalyq Odaqpen yntymaqtastyq aıasyndaǵy iri joba jáne bul uıymdastyrýshylar ýáde etken tosynsyılardyń biri edi.
Halyqaralyq deńgeıdegi mundaı sharalar elimizdiń týrızm salasyn damytýǵa da zor úles qosady.
Qarlyǵash QURAMYS,
«Egemen Qazaqstan»