Tarbaǵataı aýdanynyń Qytaımen shekaralas Aqjar óńirinde sońǵy 4-5 jyldyń kóleminde jabylýǵa jaqyn qalǵan 3 bilim ordasy irgesin keńeıtipti. Jańaaýyl aýyldyq okrýgine qarasty Saryóleń eldi mekenindegi tórt jyldyq mektep 9 jyldyqqa, al Jalańashtaǵy bastaýysh mektep pen Ahmetbulaq aýylyndaǵy negizgi orta mektep óz mártebesin mektep-balabaqsha kesheni dep aýystyrypty.
Buǵan aýdandyq bıýdjetten 150 mıllıon teńge shamasynda qarajat jumsalypty.Tarbaǵataıdyń shekaraǵa taqaý aýyldaryn aralaǵanymyzda irgesi keńeıgen Saryóleń aýylyndaǵy 9 jyldyq mektepke arnaıy baryp, tynys-tirshiligimen tanystyq.9 jyldyqtan 4 jyldyqqa qysqaryp, jabylýdyń az-aq aldynda qalyp qalt-qult etip turǵanda 2014 jyly Tarbaǵataı aýdanynyń ákimi Dildábek Orazbaevtyń qoldaýymen qaıta ashylǵan mektepte qazir 41 bala oqyp jatyr. «2013 jyly aýdan ákimi osynda kelgende mektepte 24 oqýshy, 3 muǵalim ǵana bolǵan edi. Aýdan basshysy «oqýshy sanyn 41-ge toltyrsańdar mektepti 9 jyldyq qylyp qaıta ashyp beremiz» degen soń aýyl turǵyndarymen aqyldasyp, bala sanyn 43-ke jetkizdik», - deıdi Jańaaýyl aýyldyq okrýginiń ákimi Dáýitbek Nııazbekov.
Aýdan ákimdigi mektepti 9 jyldyq qylyp keńeıtýmen qatar aýylǵa balabaqsha da ashyp beripti. Burynǵy Mádenıet úıiniń ishinen ashylǵan balabaqshada 15 búldirshin tárbıelenip jatqan kórinedi. Saryóleńdegi Baýyrjan Momyshuly atyndaǵy negizgi orta mekteptiń dırektory Erjan Ysqaqov shaǵyn bilim ordasynda ustazdarǵa, oqýshylarǵa tıisti jaǵdaı jasalǵanyn, qural-jabdyqtardyń jetkilikti ekendigin, mekteptiń ınternetke qosylǵanyn aıtyp, aýyldaǵy balǵyndardyń sportpen alańsyz jattyǵýyna múmkindik beretin sport zal salynsa degen tilegin jetkizdi. Mektepte arnaıy sport zal joqtyǵyn, oqýshylar kúrespen tóbesi alasa, tar bólmede jattyǵyp júrgenin biz de óz kózimizben kórdik. Saryóleńniń shymyr bozbalalary osyǵan qaramastan Aqjarda, aýdan ortalyǵy - Aqsýatta ótetin jarystarǵa qatysyp júr.
Búginde Tarbaǵataı aýdanynyń barlyq aýyldaryndaǵy mektepterge ınternet qosylyp, óńirdiń barlyq eldi mekeninde úlkendi-kishili balabaqshalar jumys istep tur. «Biz ásirese aýdannyń shekaraǵa jaqyn aýyldaryna erekshe kóńil bólip, balabaqshasy joǵyna balabaqsha ashyp, medısınalyq pýnktterdi jóndetip, qosymsha shtattar berip jatyrmyz. Aýdandaǵy jumys istemeı, esigine qulyp salynyp turǵan Mádenıet oshaqtarynyń barlyǵyn iske qostyq. Keıbir aýyldaǵy Mádenıet úılerinde turǵyndardyń sportpen shuǵyldanýyna da ruqsat berip otyrmyz. Sebebi, Saryóleńdegi sekildi kóptegen shaǵyn aýyldarda deni durys sport zaly joq. Sondyqtan aldaǵy ýaqytta shalǵaıdaǵy, ásirese shekaradaǵy aýyldarǵa balalardyń voleıbol, fýtbol oınaýyna múmkindik beretin sport zaldary salynsa jaqsy bolar edi. Elbasy óz Joldaýynda aıtqan «Aýyl – El besigi» jobasy aıasynda Úkimet osy sharýany qolǵa alsa ıgi is bolar edi. Máselen, Tarbaǵataıda qystygúni saǵat 4-5-terde kún batady. Bala ne isteıdi? Úıde otyra ma? Sport zal salyp bersek malyn jaıǵaǵan soń sport zalǵa barmaı ma? Sol jerde eki saǵat fýtbol oınasyn, basketbol oınasyn, sportpen shuǵyldansyn. Barlyq jaǵdaıyn jasap qoıaıyqshy. Soǵan kóp qarjy ketpeıtin shyǵar», - deıdi aýdan ákimi Dildábek Orazbaev.
Shekaralyq aýyldardyń kópshiligine ortaq taǵy bir túıtkil – baspananyń joqtyǵy. Daıyn baspana bolmaǵannan keıin jas mamandar qaıda baryp turady? Máselen, shekaraǵa taıaý Jańatalap aýylyna barǵysy kelgen eki jas dáriger turatyn úı tappapty. Aýdan ákimi osy máseleni sheshý úshin kásipkerlerge «osyndaı aýyldarǵa úı salyp berińder, biz «Dıplommen – aýylǵa» baǵdarlamasy arqyly satyp alamyz» dep usynys aıtypty.
Azamat QASYM,
«Egemen Qazaqstan»
Shyǵys Qazaqstan oblysy,
Tarbaǵataı aýdany