Chelıabi oblysynda túrki tilderinde kórkemsóz oqýdan birinshi ret ótken ashyq oblystyq baıqaýǵa sol óńirde turyp jatqan qazaq qandastarymyzdyń balalary da qatysty.
«Birinshi ret ótip otyrǵan baıqaý aldymen ana tildi saqtaýdy jáne talanttardy izdeýdi maqsat tutty. Sonymen qatar kórermender nazaryn túrki halyqtarynyń otandyq jáne álemdik ádebıeti shyǵarmalaryna aýdarý boldy» deıdi Chelıabidegi «Jaqsylyq» qazaq ulttyq-mádenı qoǵamdyq birlestiginiń jetekshisi Iýlıt Baıdáýletova.
Baıqaý Chelıabi oblysynyń úsh óńirinde Agapov aýdanynda, Qýnashaq, Bakal qalalarynda qatar ótken. Agapovta ótken baıqaýǵa Magnıtogor qalasy men Chesma, Naǵaıbaq, Qyzyl aýdandarynda turatyn qandastarymyzdyń balalary qatysty. Onda proza men poezııa atalymdary boıynsha tatar, bashqurt, qazaq, azerbaıjan, tájik, túrik aqyn-jazýshylarynyń shyǵarmalary oqyldy. Kórermender qazaq balalary oqyǵan Abaı shyǵarmalaryn tyńdady. Mektep oqýshysy Jádiger Nurymov Juban Moldaǵalıevtyń «Men – qazaqpyn» poemasynan úzindini óte kórkem oqyp, kórermenderdiń qoshemetine bólendi, laýreat atandy. Sonymen qatar Krylovtan Abaı aýdarmasyn oqyǵan Myńbaeva Álııa men ony daıyndaǵan muǵalimi Gúlsara Turǵynova da jeńimpazdar qatarynan kórindi.
Tómengi synyp oqýshylary da qazaq tilinde óleńder oqydy.
Názıra JÁRIMBET,
«Egemen Qazaqstan»
Qostanaı