Jyl basynan beri oblys óńirinde 538 bas mal urlanǵan. Sonyń 215 basy ǵana, ıaǵnı 39,9 prosenti tabylyp, ıesine qaıtarylǵan. Qalǵan 60 prosentiniń izi sýyp, tabylmaı ketken. Shuǵyl izdestirý sharalary kórsetkendeı, joǵalǵan jylqylar Reseı federasııasynyń aýmaǵyna ótip ketken. Jylqyny barymtalap ketý shekaraǵa jaqyn ornalasqan aýdandarda jıi oryn alady. Qyrkúıek aýynda Denısov aýdanyndaǵy Sınegorsk selosynda «Prostory» JShS-niń 47 bas jylqysy qoldy bolyp, sharýashylyq 8,5 mıllıon teńge zııan shekken. Denısov aýdanynda jáne Chelıabi oblysynyń Varna aýdanynda shekaranyń qorshalmaǵan ýchaskeleri urylardyń jolyna aınalyp tur.
Búginge deıin oblystyq polıseıler 22 adamnan turatyn 9 qylmystyq topty ustaǵan. Olar 44 ret mal urlaǵan. Oblystyq ishki ister departamenti qyzmetkerleriniń aıtýynsha, aýyl turǵyndary malǵa en salýǵa nemese tańbalaýǵa salǵyrt qaraıdy. Sıfrlandyrýdyń jetistigine nazar salyp, «Djıpıes» júıesin qoldanbaıdy.
Názıra JÁRIMBET,
«Egemen Qazaqstan»
Qostanaı