Qazaqstan Ardagerler keńesiniń kezekti kóshpeli semınar-keńesi Býrabaı baýraıynda «Elbasy Joldaýy – halyqtyń ál-aýqatynyń artýyna negiz» taqyrybymen ótkizildi.
Ardager qaýym bas qosqan júzdesýdi Parlament Májilisiniń depýtaty, Respýblıkalyq ardagerler keńesiniń tóraǵasy Baqtyqoja Izmuhambetov ashyp, júrgizip otyrdy. Elbasy Nursultan Nazarbaevtyń taıaýda ǵana Qazaqstan halqyna arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn ózek etip, baıandama jasady. B.Izmuhambetov óz sózinde aldaǵy ýaqytta eń tómengi jalaqynyń mólsheri 1,5 ese ósetindigine toqtaldy. El turǵyndarynyń áleýmettik-turmystyq jaǵdaıyn jaqsartýǵa septigin tıgizetin bul janashyrlyqty kópshiliktiń qýana qabyldaǵany atap aıtyldy. Aldaǵy ýaqytta jarty mıllıonnan astam adamnyń áleýmettik-turmystyq jaǵdaıy kóp-kórim jaqsaryp qalatyn bolady. Oǵan qosa bıylǵy Joldaýdyń joǵaryda aıtylǵan máselege aıryqsha mańyz berip otyrǵandyǵy jan-jaqty baıandaldy.
– Depýtat retinde el ishinde jıi bolamyz, sol kezde kópshiliktiń tarapynan aıtylatyn jaılardyń bári derlik Joldaýda kórinis taýyp otyr dep aıtsaq, eshbir artyqtyǵy joq. Qordalanyp qalǵan máselelerdi tamyrshydaı dóp basyp otyr. Máselen, ustazdardyń jaıy, olardyń óz mindetterinen tys qosalqy jumystarǵa jegiletindigi aıtylyp júrdi emes pe. Endigi arada ustazdar mártebesi týraly zań qabyldansa, bolashaq baǵbandary ózderiniń negizgi mindetterin minsiz atqarýǵa múmkindik alady. Jastar jylyn jarııalaýdyń astaryndaǵy mán de tereń, – dedi ol. «Rýhanı jańǵyrý» baǵdarlamasy boıynsha júzege asqan qanshama sharýa jipke tizgendeı etilip baıandalyp, osy ortaq iske bas-kóz bolǵan ardagerler qaýymynyń aýqymdy eńbegi de atalyp ótti.
Aqmola oblysy ákiminiń orynbasary Aına Mysyrálimova oblystyń áleýmettik-ekonomıkalyq jaǵdaıy týraly baıandap berdi. Elbasy Joldaýyndaǵy alǵa qoıylyp otyrǵan mindetter údesinen shyǵý jaıy da qamtyldy.
Munan soń sóz alǵan Almaty qalalyq ardagerler keńesiniń tóraǵasy Erenǵaıyp Shaıqutdinov, Soltústik Qazaqstan jáne Qostanaı oblystyq ardagerler keńesteriniń tóraǵalary Eskendir Eleýsizov pen Kenjebek Ýkınder táýelsiz eldiń tuǵyryn bıiktetýge ólsheýsiz úles qosatyn Joldaýdan týyndaǵan asqaraly mindetter jaıyn kópti kórgen qazyna qarttardyń danalyq kózimen sholyp, daralyq oıymen áspettedi.
Keńeste ardagerler qoǵamdyq uıymyn qarjylandyrý, dári-dármekpen jetkilikti qamtamasyz etý máseleleri kóterildi. Jıyn sońynda el ishinde ózderiniń bıik parasattarymen, kisilik kelbetterimen oralymdy ortaq iske dúmdi dińgek bolyp, keıingi tolqynǵa temirqazyq, nysana ispetti jol siltep júrgen bir top ardagerge Alǵys hattarmen qosa estelik syılyqtar tabys etildi.
Baıqal BAIÁDIL,
«Egemen Qazaqstan»